Thla hmasa chawhnu lam khan Chandigarh-ah Press Information Bureau huaihawtin 'journalist synod khawmpui'  hmangin tirh kan ni ve a, Union minister te'n kan hriat duh min hrilhfiahna hun ni hnih ngawt kan hmang a, ‘report kan chhuah nual tawh tho' tiin ‘masala' lam rilruah a lang tlat. Palai thlen kim zanah Harayana CM Manohar Lal chenna Inah zanriah min ei tira; kawtzawla dawhkan inhung fer fur zinga Kashmir journalist 4 thutkhawmna dawhkan chu ka thianpa Adawnga, Vanglaini nen chuan kan pan ding nghal chat a - Kashmir a 'hot' lai a ni bawk a, a hmuna awm chilhte ka ngei atanga hriat duh kan neih vang a ni. Hawihhawm takin thutna min lo rem thatsak sawk sawk a; kan sira journalist leh official te chu an awm tih kan hre chang tawh lo. Kashmir-a hel pawl te leh sipai boruak tang at reng mai inkara seilian an ni bawk a; min chhan dan pawh a hriamin a ri hraih mai a. A tir lamah chuan zawh chhunzawm chak awm lo lek lek thin mah se zawh chik deuh erawhin an inhawng zaw phian a. ‘India leh Pakistan hi an indo dawn em'? tiin zawhna mawl mang tak kan han pe nghal phawng mai a, min chhanna chuan ngaihtuahna a hruai thui duh ang reng hle mai. ‘Kashmir-a mi cheng tlemte 10% pawh tling lo hian India emaw Pakistan emaw zawm an duh a, a bak chuan a khawi a mah an duh lo ve ve' chuvang chuan alawm United Nations ah pawh chhawp chhuah a nihna chhan,' tiin an zinga naupang ber chuan kan zawhna chu a chhang nghal pawp mai a. ‘Surgical Strike a awm tak tak leh tak tak loh lam ka hre lo, mahse khaw tam tak atanga inthiar chhuak te kha thuneitute atanga inthiar chhuak tura tih vanga chhuak an ni lo va, ‘mainland' media-in a nihna piah lam an rawn nawr vaka mipui chiaiin an khua an chhuahsan mai zawk a ni,' tiin national media chunga an vui thu pawh an sawi hreh lo hle. Chutiang bawkin Pakistan lama media pawhin an tih ve tho thu an sawi hmiah ngam bawk. ‘SAARC summit hnai tawhah ram ropui leh tantu ngah pholan tumna a awm a ni thei lo maw?' tia Hmarchhak state kilkhawr ber zawhna chu Hmar lam tawpa media unau te chuan min 'Amen' pui thei mauh mai bawk a. Hemi bakah hian ngaihdan a la inzul chho zel bawk a. Thangkhat lian aia rei tawh silai leh bomb ri dup dup kara nu nau thlabara an awmna hmun a awm a, chutiang ang hre pha lo mawlmang taka khawsa tam tak an awm thu an sawi bawk a. Ram pahnihin an inchuhna a nat avangin nun nghet nei lovin a tam zawk an seilian a, thanhnan a nih tawh avangin nghet thei lo nia inhriatna rilru puthmang (mindset)  nghet tak a piang lawi si a! Hei zet zawng an vei chiang e. Hmabak a ko khawp ang. Sipai thuneihna Armed Forces Special Power Act (AFSPA) hmanna state a chengte rilru a danglam dan hi sawi zau ngai niin ka hre lo va, ram buai vanga a taka hmanna hmun phei chu zirchianna tham a ni. Hmarchhak state-ah pawh hman loh theih lohna hmun a awm bawk. Journalist khawmpui/kalkhawmna hi ka chhim ve nual tawh a, AFSPA a taka hmanna hmun atanga lokal thenkhatte ziaah danglamna a awm duh ang reng khawp mai. Kashmir thiante dungthulin Hmarchhak hmun thenkhata mipui ‘mindset' mak tak piang mek a awm thu an sawi hreh lem bik lo, anmahni a nghawng tih an pha lo fo a. ‘Kan khawpuiin lo tum luh chuan him vak lo nia inhriatna (fear psychosis) in a delh loh che u chuan in pangngai vak lo a ni mai,' tia thenawm media thian tha pakhatin fiamthua a sawi kha rilruah hian a lang thar leh a ni ber mai. Zoramin remna leh muanna nei turin hun rapthlak tak a paltlanga; kum tam tuarin vawiin kan thleng tlang a. Ralmuang leh thinthia awm hi a lo va han hlu em!