Mizoram leh hmarchhak ah damdawiin a la changtlun tawkloh avang te leh mithiam an la tam tawkloh avangin hmunpui zawk kan pan lo thei lo a. Sum leh pai lamah harsa mah ila dam hi a hlut avangin neih zawng zawng bakah pukbelhin hmunpui zawk kan pan thin. Hmun hla tak tak pan mahila mi tam tak chu an boral tho a, mahni khua leh veng ngeiah phum kan duh avangin man to tak takin kan in phur haw thin a, chhungkhat laina, thiantha leh sawrkar pawh an buai thin a ni. He harsatna chhawk zangkhai tur hian Jet Airways chuan hmarchhak state 8 te tan ruang phurhman zaa sawmnga (50%) in a titlawm dawn a, hmarchhak a chengte tan chuan thil lawmawm tak a ni. North East mi tam tak phai ramah zirna leh eizawnna dap avang tein mi tam tak an awm a. Heng mite hian chhan hrang hrang avangin damlohna te an tawk thei a, thihna hial pawh an tawk thei a ni. Vanduaina te tawkin thihna hial lo tawk se, an ruang phurh haw na turin sum leh pai tam tak a ngai a ni. Mi tam tak chu sum an neih loh vangin an thihna hmunah, an chhungte pawh awm lohna ah loh theih lohin phum an ngaih phah ta thin a ni. Anmahni hmangaih ngawih ngawihtu an chhungte chuan ral khat atangin an sun a, an hmuh phak tawk chu kuang chhunga an mu lai thlalak chauh a ni thin. Heng mitthi chhungte hian nasa takin New Delhi Police-a North East mipui te enkawl tura dah te chu an chhungte ruang thawn haw sak turin an ngen thin a, an chhungten pawisa an neih loh chuan tih theih an neih bik loh thuin an chhang thin a. Mittui nena dil ngawih ngawih an awm pawhin tih theih an lo nei chuang si lo a, an mikhualna ramah an phum leh ta mai thin a ni. Hemi atan hian hmalak a ngai tih chu ngenna tam tak atangin a chiang reng tawh mai. North East mi te tan hian Delhi Police chuan thlawhna service hrang hranga an Chief Executive Officer te chu lehkha an thawn ta chur chur mai a. He an hmalakna avang hian Jet Airways atangin thu lawmawm tak an dawng ta a ni. Jet Airways chuan North East mi sum leh paia harsatna nei te tan an chhungte ruang phurh man chu zaa sawmnga (50%) laiin an tihniam dawn tih lehkha in an rawn thawn let ve ta a ni.  India ram khawpui dang atanga thawn haw man pawh tihtlem an tum bawk a ni. Airline company dang pawh bia a, hmalak zel an tum thu Delhi Police te chuan an sawi a ni.He hmathatna siamthar hi mipuiin an chhawr tangkai ngei beisei a ni.