Hna vang tih hi thumal lar tak a ni mek. Hna pe tam thei ber tu sawrkarah tam takin hna an beisei ngam tawh lova, indaih sen pawh va ni suh! Ramri pela hnathawk thalai an tam tawh a, chu'ng zingah chuan Mizo nula te inhmeh tak 'Nursing' lama kal te chuan hna an van lemin a lang lova, ti fuh leh fuh ta lemlo te pawh an kat nuk ang chu! Zalen in Kolkata a nurse thawk a kawmkual-naah hian tawng lamah harsatna nei mahse an sawi danin Hindi leh Bangla ah kar 1 ah vawi 2/3 a thlawnin class kal tir an ni bawk thin a ni. An hnathawhnaah zah an hlawh a, an tenchhiat loh vangin khawih hreh an nei lem lo a hei vang hian thlan an hlawh fo thin a; nursing lamah Mizoram chhuak chu hnam dang zingah thlangtu an pun zel an beisei bawk a ni. ‘Keini phei chu Synod Hospital-a internship kan tih lai atangin kan thawhna hospital te'n min la turin min chang tawh a ni,’ tiin nurse pakhat chuan a sawi. Docotor pakhat chuan inchhung chet leh damlo enkawlah Mizo khawtlang angah mipa aiin hmeichhia te chu nurse pawh nilo mahse an tih tura dahna a liana; Mizoram chu nursing-ah state tam takin an tluk lo tih a ngaihdan a nih thu a sawi bawk. Kolkata-a lung lam damdawi ina thawk nurse chuan a thawhchhan sawifiahin 'Facilities chu a tha hlawm viaua, kan hah bawk mahse khawpui lian zawkah damdawi In tha zawk a tam a, chung ah chuan tan chhoh zel theih niin ka hre ve tlat a. Hna dang thawk khawpui te zawka bul tan hrehawm tam tak tuar chhuakin an kaisang a, a then tunah hna sang zawkah an chhoa, nursing pawh hian a theihlohna tur ka hre bik lo; mi mal erawh zir a ngai khawp ang,’ tiin Zalen a hrilh bawk. ‘Kum 1 dawn chu phaiah ka thawk tawh a, ka chhuk thlakna chhan chu hna van thuhran nise kan rama mimal damdawi In aiin hlawh a tha fe zawk a, quarter min pe a, a thlawnin medical facility keini leh kan chhungte thlengin min pe a, Employment Provident Fund ah pawisa min khawl sak bawk a ni,’ tiin Zalen a hrilh a. ‘Ei leh in kan duty dan azirin a thlawn bawk a; keimahi mamawh insenna tur em em a tam lo khawp mai,’ tiin Kolkata-a general hospital a thawk nurse Mizo nula pakhat chuan Zalen a hrilh bawk. Multi-Speciality hospital pakhat a thawk nurse erawh chuan ram danga awm zel a tum lem lova, ‘kan ram’-a a kir leh hnua hriselna kaihhnawih sumdawnna bultanin mipui ten a tawnhriat an mamawh nia a hriat thu a sawi. State pawna kum engnge maw zat thawk tawh, Mizorama lo kir leh tuna Aizawl Civil Hospital-a contract-a thawk mek nurse pakhat chuan tha a heh em avang leh thawhna hmuna inhriatthiamna a tlem avangin hmun danga awm chu a duhlo niin a sawi thung.