Khua a la var lo a, ar khuang hmasa pawh an khuang thliai thliai tan tawh a. Tlangval leng rei fal deuh pawh khaw var hmaa mahni in lum thlen hman loh hlau in chak takin an tlan ri vung vung a, chhungkaw hrawk chawm nana thlai hnah zuarte erawh thutna hmun chan loh hlauvin an thutna hmun an pan tawh thung a, thenkhat phei an thlai zawrhna hmunah thu tlaivarin zing dar 3 bawr vel chuan an thlai zawrh tur an siam fel tan tawh thung. Aizawl khawpui chhungah kawngkama thlai hnah zuar thahnem tak an awm a, hengte hian thutna hmun mumal bik an nei lo a, seat hauh lawk chu nei mahse an thut loh tuka thut khalh tuten an thutna chu an ta neih chhunzawm mai thin. Thlaihnah an zawrh chu chhungkaw chawm nan a an hman thin avangin Inrinni tuk khat an in zawrh loh chuan an chaw bel a ruak anih nghal mai thin avangin khawsik satliah chu an sumdawnna thulh phah nan an hmang phal ngai lo. Fur lai pawh nise ruah sur karah ruahtui leh thlan tui inpawlh karah an ei bel thlai hnah zawrh chu tawrh chhel na nen an kalpui tang tang thin a ni. Khatla kawn kawngpui kama thlai zuar thin nu pakhat chuan an tlaivar mai thin thu sawiin, "Kan thlai zawrh turte hi dahna hmun mumal kan neih loh avangin rukru laka a bo loh nan Zirtawp zan chuan kan thut tlaivarpui mai thin a ni," a ti a. Aizawl atanga hla vak lo khaw pakhat atanga an thar chhuah ngei zuar a nih thu sawiin, Zirtawpni-a Aizawl an pan chu Inrinni tlai lamah ah haw chauh thin thu a sawi a. An thlai thar chu kharchhawng hnena pek ai chuan anmahni ngeiin an zawrh chuan a hlawkna an hmuh tam zawk avangin ‘zan 1 tlaivar mai mai’ chu eng teh ualah an ngai lem lo Kawngkam remchang laia thlai hnah zuarte hi thenkhat chu kharchhawng an nih rualin then khat chu mahni thlai thar chhuah zuarte an nih hlawm a, mahni thlai hnah zuarte hi Aizawl hnaih Hualngo, Muallungthu, Sihphir, leh khawper thenkhat atanga lo kal an ni. Sihphir nu pakhat chuan 4AM velah Aizawl an pan thin thu Zalen a hrilh a, "Antam hi kan keng deuh ber a, iskut erawh tam tham kan keng ngai lo," a ti. A changin kharchhawng an lei zawh tir mai thu sawiin, kharchhawn tir loa zawrh hahthlak mahse a hlawk zawk niin Zalen a hrilh. Hnathawh tur a vang tih thu sawi uar viau thin mahse Inrinni tuka thlai zuar kharchhawng leh mahni thar ngei zuar thinte hian nin chsng nei thin mahse thawhrimna leh an phurrit erawh hrawk chawm nan thung si a. Hualngo atanga Aizawla thlai hnah leh an thar chhuahte zuar thin pa pakhat chuan an thlai hnah bakah lui sangha an man te leh rawtuai an khawrhte an zawrh thin thu Zalen a hrilh a, nupui fanau hrawk chawm lai a nih thu sawiin, kartluanin in zuar chhuak thei lo mahse Inrinni tuk khat an in zawrh chhuah chuan kartluanin an mamawh a phuhruk thin tih a sawi bawk.