Khawpui a thang a, khawi hmun mai pawh khawvar rualin a lun nghal em em a. Tun hma lama eizawnna tlaka ngaih chiah loh te pawh eizawnna tling tak a ni chho ta zel a. Mipui an pung a, khawpui a thang zel bawk a, eizawnna hrang hrang a pian tak hnu phei chuan tun hma lama mamawh lo anga lang pawh mamawh leh a tel lova awm theihloh ang hial a ni chho ta zel a. Sumdawnna chu sum lakluhna satliah mai ni lovin midang tana malsawmna leh mipui rawngbawlna peng pawimawh tak a ni tih kan hre chho ta zel bawk. Ram dang leh Mizoram tehkhin a ni fo a, ram dangah chuan man tlawm zawkin ei leh in tuihnai tak tak khawlai ah lei theihin a awm mai thin a, Aizawl ah pawh khawvar hma atangin thingpui dawrte inhnawh puarna tur a awm ta nual a, hengte erawh hi chu zingkarah chauh hmuh tur an awm thung. Zing kara thingpui dawrte hi khualzin leh zing exercise la thin leh hnathawk tura chhuak mahni ina in hnawhpuar hman lote tan malsawmna an ni tak zet a ni. Zalen palaiin Aizawl khawpui chhunga thingpui dawrte a fan kualna ah thingpui lo in a, lo inhnawh puar mekte chuan an tangkaipui thu an sawi hlawm a. Thanpuii chuan zing dar 6 atanga hnathawka chhuak thin a nih thu Zalen palai hrilhin, “Zing kar kaw ruah laia ei tur thar lam lei mai theiha awm hi tha ka ti khawp mai,” a ti. Tukthuan atan chana leh paratha te chu a rin mai thin thu a sawi a. Zalen palaiin Thanpuii a kawm lai meka a bul hnaia tlangval pakhat lo thu chuan exercise la te tan hlei hlei malsawmna an ni zawk a ni a lo ti a. Chu tlangval chuan zingkarah mai ni lo ram dang ang deuhin chaw atana rin theih tur kawtkai dawr tam zual se a duh. Zingkara thingpui dawr siam te hi Aizawl khawpui lun zual deuh leh maxicab leh bus counter bul hnai behchhanin kawng sirah an in zuar tlangpui a, Temple Square-ah Commissioner of Taxes office kawtah , Millenium Centre chhehvelah , Zarkawt traffic point bul, Electric Venga Power House pêng bulah te an awm a ni. Commissioner of Taxes office kawtah thu Zami chuan zing dar 3 atanga thu tanin dar 8 thleng an thut thin thu Zalen palai hrilhin, “Tuk khat Rs.3000 bawr vel kan lei chhuak thin a, eizawnna tlak a ni khawp mai. Eizawnna a nih piah lamah hian midang tan malsawmna a lo ni reng a, lawmthu min hrilh mawlh mawlh tawk pawh kan tawng ta nual mai,” a ti. Khawlai remchang laia thingpui dawr siamte hian hmanrua an mamawh tam lo hle a, chuti chung chuan thingpui sa tha tak, bawnghnute dâi, chhangban, alu chop, paratha, chana leh artui chhum an nei tlangpui. Khawpui thang zel chuan mamawh a ngah tulh tulh a, mahni In luma tukthuan leh zanriah kil thin mipui ten khawlai a chaw ei mai an ngai tan tawh a. Aizawl khawpui chhunga Hotel hrang hrangte pawh tun hma aiin mipui mimirin an pan hnem tawh zawk a. Aizawl khawpui chhunga Hotel neitu pakhat chuan thianzaho leh chhung-khat anga chaw rawn ei an awm rual hian mimal anga ei regular an neih nual tawh thu Zalen palai hrilhin, “Mi kan buai tawh a, thenkhat chu mahnia in luaha eirawngbawl hman lo khawvar atanga zan khaw tairek thlenga hnathawkte an lo awm ta zel a, heng ho hian chaw eina tur an mamawh a ni,” a ti. Hotel thenkhata chaw ei man chu a to tham deuh vang in tun atanga hun rei lote hnu ah chuan khawlai ah man tlawm zawk a chaw eina a awm nual a rin thu a sawi.