Aizawl: United Naga Council (UNC) ten economic blockade an siam avanga Manipur-a harsatna tam zawkte chuan ziaawm lam a pan a, India sorkar, Manipur sorkar leh UNC palaite inbiakna pawhin a tha lam hawiin thu an keuhthlu thei dawn hnai a, economic blockade hi a tawp thuai beisei a ni. UNC te hian thla thum zet economic blockade hi an kalpui tawh a, ni tin mamawh chi hrang hrang harsatna namenloh Manipur-in a tuar mek a, chutih rualin Mizote khawsakna khawpui Churachandpur erawh chu Mizoram atanga chakkhai a luh reng avangin harsatna em em an tuar lo. “Petrol leh diesel ala harsa deuh tih loh chu a ziaawm viau tawh, Central YMA hmalaknaa petrol phurhluh a nih avangin kan harsatna a ziaawm hle a, duhkhawp chu kan la nei lo nain kan harsatna zualpui chuan zia lam a pan mek a, tunah hian petrol litre khat Rs. 90 leh diesel Rs. 80 a ni mek a, Mizoram lam atanga a rawn luh reng avangin Imphal lam atang te pawhin petrol leh diesel mamawhte an rawn kal zawk,” tiin Rammuanpuia, Churachandpur-a cheng chuan a sawi. Assam lam atanga rawn lut tur reng reng dan vek an nih avangin Imphal leh churachandpur lama petrol pump te chu khar an la ni vek a, ni tin mamawh leh damdawi lam pawh duhkhawp ala awm meuh lo. “Mizoram lam atangin mimal tanker ten petrol leg diesel an rawn phurlut deuh reng a, motor tea phur pawh an awm ve reng a, damdawi leh thil dang mamawh pawh Mizoram lam atanga a rawn luh reng avangin Churachandpur tak hi chu kan ziaawm viau, Mizoram zar kan zo a ni ber e,” tiin Churachandpur atanga kan thudawnna chuan a sawi bawk. Hetihlai hian Union Home Ministry, Manipur sorkar leh UNC te chuan tunhnai khan inbiakna an nei a, boruak tha zawk a awm thuai theih beiseina lian tak a awm tih Home Ministry thuchhuah chuan a tarlang. An thuchhuah chuan inremna thuthlung ziah thuai a nih tur thu a tarlang a, Feb 9 hian inbiakna neih leh a ni ang a, he inbiaknaah hian thumum zawk neih theih tawh beisei a ni, tiin ministry thuchhuah chuan a tarlang. National Highway number 2 hi November 1, 2016 atang khan UNC hian an dang tawh a, Manipur sorkarin Naga hnam chenna hmun a darhsarh zawnga district a thendarh an duhloh lantirnana kawng hi dang a ni. Nikum lam khan Manipur sorkar chuan district pasarih a siam thar a, hei hi Manipura cheng Naga tan a him lo niin UNC te hian an ngai a ni.