A hmel han thlek mai chuan a thuken nen a inmil lo ngei mai, sam thur beubo, vun rawng tak lam, thim zinga a nui hmuh awl chi tak tur a ni. Chutih rualin a sawi chuan awmzia a nei thui lawi si. ‘Nghakuai chiahin lui dung nungcha in humhalh thei, in lui te hi sangha lian tak tak chen theihna a ni,’ tih a sawi nawn sek lehnghal. Amah chu Derek D'Souza a ni a, hmanni lawka Fisheries Department-in Sangha Kut an hmana rawn tel a ni. Zalen in Derek-a tawitea a kawmna hi han chhiar la, ngaihtuahna thar i fawm mahna. ZALEN: Nghakuai chiah hi tawite in min han hmelhriat tir teh? Derek: ‘Angling’ hi khawvelah chuan a industry a lian tawh hle a, vaibelchhe tam tak an lalut ruih ruih a,  US leh Europe chauh nilo Asia-ah pawh industry lian tak a ni. India ah pawh hian mumal zawkin a in siam fel mek a, Himalayan tlang bulthut state leh North East hi chutah chuan hmun pawimawh tak chang thei niin ka hmu a ni. Sports/ recreation a nih avangin nghakuai chiah chingte chuan hmun hla tak tak te an pan huam a, an sangha man tam ber chu Masheer a ni a, chu chu in lui dungah hian a tam ber a ni nghe nghe. Tunah hian Trustees of The Mahseer Trust ah Board Member ni lai mek ka ni e. ZALEN: Nghakuai chiah hi engtin nge i luhchilh? Derek: Kum 4 ka nih atangin nghakuai hi ka chiah tawh a, ka chenna Mangalore a chiah tan ka ni a. 2003 khan Masheer sangha ka man a, ka nghakuai a tliak lehnghal a, chumi atang chuan he sangha hi ka ngai zawng ta tlat a, ka ngaihzawng chu humhalh ka tuma ka kalna apiangah ka thiam danin ka sawi ve thin. ZALEN: Nghakuai chiahin engtin nge nungcha kan humhalh ang? Derek:    'Nghakuai chiah (angling) hi chi 2 a awma, ei tura chiah an awma, sports/recreation hmanga chiah an awm bawk a, a pahnihna hi ka naupan lai atanga ka tih tawh a ni a. Kei chuan nghakuaia sangha man hnua chhuah leh hi ka ngai pawimawh bera, chumi chuan environmental tourism hi a tih theih tih ka hmu tawh a ni. Entirnan nghakuai chiah turin khualzin an lo kal a, ei leh in, veivahnaah in ramah sum a rawn hmang phawt a. Lui dungah tualchhung mi inhlawh nan a inhruai tira, kar khat tal chu an chamchilh a ngai hrim hrim a. Nghakuai hmanga sangha man te chu thlalak pui an nih hnuah chhuah leh an ni a. Tualchhung mi tan chuan he sport hi sum hnar pakhat a nih tak avangin luidung leh sangha chu a humhalh lo thei lo a ni. ZALEN: India ram dangah an hlawhtlin pui tawh em ni? Derek: Uttarkhand-ah chuan 'angling' hian thingtlang khaw thenkhat tan 'seasonal' eizawnna a siamsak nasa tawh a. Sangha man chu chhuah leh a nih avangin man nawn theih an ni a, man nawn fo an ni bawk a. Sangha pakhatin a sum thawhchhuah chu cheng sing tam tak a ni thei a. Bazaar rate-ah kilogram khat Rs 200 a chhutin a chhuak tam thei hauh lo thung. Uttarkhand-a ka hmuh ang hi Mizoram-ah pawh tih theih a nih lohna chhan tur ka hre lo. ZALEN: Thingtlang mi nilo tan Masheer malsawmna rah hi tel theih a ni em? Derek: ‘Angling’ hian sumdawnna lam hawiin ken tel tam tak a nei a, a 'rod' hi cheng sang tam man a ni a, sangha lian man nan phei chuan cheng sing tam man rod te a lo ngai a. Chutah a hrui hi a hrang hrang a awm a, a chiah chi/chah te, hook te pawh chi hran hran a awm bawk a. Heng zawrh hi eizawnna a ni thei ang chu. ZALEN: Sawi duh dang i nei em? Derek: Mizo te hi ka hmuh dan chuan in thil duh dan (taste) a sang a, angling hi recreation emaw sports ah emaw in tih hmuh theih thil niin ka hria.  Hmun danga an hlawhtlinpui ang hian in theih ka ring tlat a ni. Chumi tur chuan luidung tura hrai te, bomb hmanga sangha man te hi tih tawp ni sela, 'angling' hian a thlak theih ka beisei tlat a ni.