Hnam leh hnam inkara inauna tha zawk a awm theih nan te, ram dang la hriat ngai loh tlawh nan leh chhan hrang hrang avangin lirthei leh ke hmangte in mi tam takin an la kal ngailohna hmun an tlawh thin a. Mizo pa, C. Lalawmpuia, Dawrpui veng Aizawl pawhin thirsakawr hmangin Aizawl atanga Kolkata inkhalh thlen a tum a, tunah hian kawng lakah a thang mek.
 

C.Lalawmpuia @ Maawma hian a thirsakawr hmangin January 26, 2022 (India Republic Day) ni tak khan Aizawl a chhuahsan a, tluang taka kalin Guwahati a thleng tawh a. Ruahman dan chuan nimin lamah Kolkata a pan ang a, kawng lakah hian ni 2/3 vel chu hun hmangin tunkar tawplam chuan Kolkata hi a thlen theih beisei a ni. Ruahman dan chuan C.Lalawmpuia hi ni 2/3 vel Kolkata-ah hian a cham ang a, a lo haw hun tur tak hi hriat a ni lo nain a hriselna dinhmunte enfiah a nih hnuah thlawhna hmangin lo haw a tum a. Karleh lam chuan Aizawl a lo thlen leh theih beisei a ni.

    ZALEN zawhna chhangin C. Lalawmpuia nupui Linda Chanchinmawii chuan, “Mizoramah hnam dang thirsakawr leh lirthei hmanga lokal an awm zauh zauh a. Hetianga hnamdang ten an tih ang hi Mizoten kan ti ve thei a ni tih lantir hi a tum a. Zuk leh hmuam tel lo adventure hman a duh vangin hetiang thil hi a ruahman ta a ni,” a ti. Linda-i chuan a pasal chu a kalna kawngah mi dangten an lo dawngsawng tha tih sawiin nuam a ti hle niin a sawi bawk.

    C.Lalawmpuia hian zuitu pawh nei lovin amah chauha kal a ni a, a thlen chin hmun remchangah a riak mai thin a. A kalnaah hian khua a vawh deuh avangin kal chak a harsa deuh niin an sawi a, Pathiana innghat leh Amah ring chungin a thiltih hi a tawp thlen ngei a tum niin a nupui, Linda Chanchinmawii chuan ZALEN a hrilh bawk. Aizawl atanga Kolkata inkar hi km 1,500 bawr vel nia ngaih a ni.

    C.Lalawmpuia hi sana dawr hmingthang tak Aizawl Watch House neitu, C. Thangkima (L) leh Rodingliani, Dawrpui te fa tlum ber a ni a. Kohhran leh khawtlangah pawh theihtawp chhuaha inhmang thin a niin tunah hian Dawrpui South Welfare ah Treasurer hna chelh mek a. Infiamna lamah pawh hnuhma eng emaw zat neiin Mizoram Cycling Association din kawngah pawh a thawhhlawk hle. Tunah hian an nupain Aizawl Watch House leh Aizawl Baker’s Stop te an enkawl mek a ni.