- Crossa Kosbek

Mizoram hi tlangram, khaw tin hi kawngpui tha takin a chhun tlang that loh a ni hlawm avang hian lirthei ke pali neih chi aiin ke hnih nei chi nena zin veihvahna rem a nih zawk avang hian motorcycle tourism hi thil pawimawh tak a ni.

Motorcycle hian lirthei ke pahnih nei, engine nei tawh phawt chu a huam thei ang a, chumi hmanga tourism ti phuisuih leh ti changtlun chu kan ram tlangram, ram mawi tak, thlir nuam em em tan hian a pawimawh hle mai.

Tourist hip tur hian a hmun hi pawimawh ber a. Kan ram hian potential a nei tha kan ti thin a, hman atang tawh in vawiin thleng hian a potential chu a ngai reng. Mahse kawng hmang nei a kan kalpui loh avang hian tourism lamah kan la sang tawk lo hle a awmze nei a kalpui erawh a hun hle thung.

Motorcycle tourist te hian zin chhan a neih zingah leh motivate tu ber zingah chuan a ram hmelhmang hriat chakna leh mawina hian a hip ber a. A chhan dang lian lehzual deuh te chu adventure te, hmun hlui tlawh chakna te, Pi Pu sulhnu leh culture hriat chakna te, thiante tlawh te hi tourist te hip chhan lian zual deuh deuh te an ni. Heng bakah hian chhan dang la awm leh thei te chu chhungte tlawh te, thil thar va hriat belh duh vang te, thian siam duh vang te, intih thawven a khawpui traffic tawt atanga kal chhuah hrim hrim escapism te leh chhan hrang hrang vang te a awm thei ang. Chutiang chhan hrang hrang te hmun khat a kan lakkhawm a kan hipkhawm theih nan event enge maw remchang kan lo buatsaih hian remchanna zawngin an kal ta thin a ni.

Motorcycle tourist te hi Mizoram chhung mi domestic tourist atanga bul tanin ram dang leh ram pawn thlenga lo dawngsawng zel thei tura hmalak a pawimawh hle a. Tourist te hian sum leh pai an rawn keng tlangpui a. Sum thehchhuak thei tura zin vei vak an nih avang hian an sum theh­chhuah dawn thleng tur siam thiam kha thil pawimawh ta em em a chu a ni.

Motorcycle riders te hi tourism ti hmasawn tu te an ni, a chhan chu, riders te hi mi chi hrang hrang eizawna hrang hrang, heng Corporate executives, businessmen, technologists, enterpreneurss, defence personnel, State leh Central-a sorkar hna thawkte an ni hlawm a. Chungah chuan Bloggers, Youtubers leh Social media tam tak khawi vek an ni hlawm a. FB, IG etc ah friendlist/followers te sang tel an nei deuh vek a. Entirnan han sawi ta ila, March 4 – 6, 2026 khan Champhai Buffalo Motorcyle Club huaihawt in Zopuiphul, Samthang khuaah Mizoram a Royal Enfield kutpui lian ber Mizoram Enfield Kutpui (MEK) an thleng a, mi 500 chuang in an chhim a. State pawn atangin lo kal te hian an lo kal na hmun tin leh khawtin an tlawhna apianga an thlalak te social media a an phochhuah khan mi nuai 10 atang 20 velin an en thin ang an ni. Chu lo liam a tourism ti hmasawn tu an awm thei lo ang.

Nunphung hriat duh vang leh hmun hlui tlawh leh Pi leh Pu sulhnu hmuh chakna eco-tourism te, tawn hriat neih tuma zin adventure tourism te hi motorcycle tourist rider te hipna ber leh thlir ber te a ni kan ti thei ang.

Riders te hi mimal (solo riders) a zin an awm lai in kawppui te nen a zin an awm bawk a. Riahna hmun remchang lai a puan in kaih a riak an awm laiin thenkhat homestay, farmstay, paying guest, hotel etc. a thleng an awm bawk thin a, in sengso lo in an kal ngai lo a ni. Event engemaw a lo awm khan chu chu an focus-a an tinzawn bik thin.

Kan ramah hian two wheeler awmzat hi lirthei zawng zawng registration atangin 70% aia tam a ni a. December ni 31, 2025 thlenga Mizoram a lirthei in register zat 3,45,914 zingah hian lirthei ke hnih (two wheeler) nei chi chu 2,46,865 a ni a, Heti khawp a two wheeler tam ta hi thu neitu te hian kum tawp lamah emaw Chapchar kut hnai­ah emaw hian MIZORAM BIKE WEEK emaw te hi min siam sak ta se; scooty, Honda, Bullet, Yamaha, etc theuh te pawl leh club ten thil tha tia charity leh thil dang an ti thin kha he MIZORAM BIKE WEEK chhung hian nei thin ta se, chutiang huna hun hmang tura lo tel tum leh rawn hmu duh hrim hrim tourist hi kan hip lehzual ngawtin a rinawm.

A chunga kan sawi tak atang hian adventure tourism leh eco-tourism tihmasawn nan leh a lo changtlun theih nan motorcycle tourism hi a lo pawimawh hle mai.