ZALEN October 8, 2023 : North Eastern Council (NEC) sum cheng nuai 685 kaltlanga ruahman tur sapthei sawngbawlna hmunpui ‘Passion Fruit Processing Unit’ New Champhai ami chu nimin khan Transport Minister TJ Lalnuntluanga chuan a lungphum a phum.

Lungphum puala hun tawi hman, Champhai DC James Lalrinchhana kaihhruaiah TJ Lalnuntluanga chuan thu sawiin Champhai kuthnathawktu, sapthei chingtuten an harsatna leh mamawhnate a hnena anlo thlen thin chu bawhzuiin ‘Passion Fruit Processing Unit’ Champhaia din tur hian Sawrkar Laipui Ministry of Food Processing te pawh tum engemawzat an dawr thu leh NEC hnuaiah tih hlawhtlin anih tak thu a sawi a. Chief Minister Zoramthanga chuan Champhai District sapthei chingtute mamawhte a ngaih pawimawh takzet thu leh, he Project hi NEC project dilna zingah ngaih pawimawh (priority list) ah a dah thu sawiin, kuthnathawktute leh District mipuite aiawhin a chungah lawmthu a sawi.

R. Thangseia, Chairman, Champhai Passion Fruit Growers Society chuan Technical Report a pe a. ‘Creation of Passion Fruit Processing Unit at Cold Storage, New Champhai’ hi NEC cheng nuai 685 hmanga ruahman tur a ni a. Civil works atan hian cheng nuai 185 dah niin, sapthei sawngbawlna khawl hrang hrang leina atan cheng nuai 500 ruahman a ni.