November thla tira Unai Emery an lak luh lai khan Aston Villa kha tlak hniam hlau an ni a,  17-na daih an ni a. Tunah erawh panganaah chhovin season tharah Europe intihsiaknaa inlan ngei beiseiawmah a awmpui leh ta der thung.

October thla tawp lama Craven Cottage-a Fulham an tlawh tum khan 3-0 ngawtin an tlawm haw a, boss Steven Gerrard chu tuar bertu niin bân zui a ni a, a thlaktu turin Arsenal manager hlui hi lak luh a ni.

Emery-a’n Villa Park a pan lai hian Premier League season thar inkhel vawi 11-ah vawi hnih chiah chak an ni a. Spanish coach-in November thla tir atanga a kaihhruai hnuah erawh league-a an inlan vawi 20-ah vawi 13 zet hnehna a chanpui ta a, an chak loh hnuhnung ber chu February thlaa hmahruaitu, Arsenal-in 4-2 a an hneh kha a ni daih tawh.

Tunah chuan kum 13 zet hnua a vawi khat nan Villa Park-a European football en tur chhawp leh thei dinhmunah a hung ta.

Europe-a an inlan hnuhnung ber chu August 10, 2010 daih tawhah Europa League play-off-a Rapid Vienna an hmachhawn kha a ni daih tawh.

Villa hian Thawhlehni zan khan Fulham mikhualin Tyrone Mings-a goal hmanga si khat faia hnehin Premier League-ah panganaah an kai a, kum 2010 hnua a vawi khat nan Europe-a inlan thei an ni ta mek.

Emery hnuaiah hian Villa hi a zawnin inkhel vawi 10-ah tlawm an nei ta lo va, Tottenham Hotspurs aia sangin pathumna Newcastle United chu point ngain an la phak lo va; mahse, khelh hnihin an khel tam zawk thung.

England atang hian FA Cup final-a inhmachhawn tur, Manchester City leh Manchester United chu season thara Europe-a inlan turin an dinhmun an sawh nghet tawh a, Villa tan hian pasarihna nih phak chuan Europe-a inlan theih a ni ang.

Pangana emaw, parukna emaw an nih chuan Europa League group stage-ah an tel thei dawn a, pasarihna an nih pawhin Europa Conference League play-off tal an khel thei ang.

Heng zawng zawng hi tunah chuan an kutah a awm ta mek a ni.

Hetih lai hian khelh nga an la neihah a sang pariat zinga awm - Manchester United, Tottenham, Liverpool leh Brighton bakah Wolves nen West Midlands derby an la khel dawn a, anmahni ang bawka Europe-a inlan tum an nih theuh avangin theihtawp takmeuh erawh an la chhuah a ngai dawn.