Aizawl: Coordination Committee on Traffic Management-in October 2017 atanga lirthei intlanchhawk tura ruahmanna an siam hnuah mahni tlanchhuah loh nia tlan lirthei 684 man a ni tawh. Traffic hotute hnen atanga Zalen thudawn danin dan bawhchhe zingah hian two wheeler an tam ber a, heng dan bawhchhia te hi pawisa chawitirin an hawtir leh thin niin an sawi. Lirthei intlanchhawk chu awmzia nei nia sawiin Traffic thawktute chuan, “Traffic jam chu la awm tho mah se ni dang angin a jam nghet lo va, ni dangah chuan darkar 2 te a jam thin a; mahse, tunah chuan nasa takin a ziaawm a ni,” an ti. Traffic thawktute chuan intlanchhawkin a huam ve loh dak sem, damdawi in thawk leh eng emaw pawimawh zual bikte chu an hre thiam thin niin an sawi bawk. Naktuk Thawhtanni chawhnu dar 2 hian Coordination Committee on Traffic Management hi an chairman Home Minister R.Lalzirliana hovin Chief Secretary Conferrence Hall-ah an thukhawm leh dawn a, lirthei intlanchhawk chungchang leh thil pawimawh dangte an sawiho ang.