ZALEN September 24, 2025: Lunglei-a school lian ber Baptist English School chuan tunlai tlang hri lengin an naupangte a man nasat avangin ni 2 chhung chawlh an puang. School thuneitute chuan nu leh pate hriatthiamna ngenin thuchhuah an siam a ni.

An thuchhuahah chuan tunlaia tlang hri lengin an school a chiah hneh hle niin an tarlang a. Kar hmasa atang khan school naupang damlo an pung chho zel a, natna hian kar khat te a awh tlangpui a, an inkai darh chak hle niin an tarlang bawk.

Thawhtanniah khan damlohna avangin zirlai 325 an kal thei lo a, Thawhlehniah khan zirlai 445 an kal lo leh a. Niminah khan zirlai 528 an kal theih loh bakah zirtirtu kal theilo leh nuamsam lo eng emaw zat an awm bawk a ni.

Naupang kal lo an tam avangin class test an neih theih loh phah nual a, Neltas exam tur pawh an tawlh hla zel rih bawk a. Tin, zirtirna pawh a pangngaiin an kalpui thei lo a ni.

Doctor te an rawn a, thawktuten ngun taka an ngaihtuah hnuah Ningani leh Zirtawpni hi chawlh puan mai an titlu ta a. Inrinni leh Pathianniin a zawm dawn bawk avangin inkai darh pawh a ziaawm phah an beisei a. Karleh lamah pawh dam chiang lo leh damkawr lutuk chu school kal lo turin an inngen a ni.