Thansanga & Sons Auto Division chuan a showroom Ramhlun North, Aizawlah Zirtawpni khan Yamaha R3 BS6 an tlangzarh a, paruk an hralh chhuak nghal.

Mizoramah Rs 4,97,114-in lei a ngai a, Yamaha motorcycle dealer principal Robert Lalremruata chuan, “Hralh tam vak chi a ni lo va, hralh that erawh kan inring. US velah an fak em a, sports bike ngaina tak tak duhthusam phuhru thei tura beisei a ni,” a ti.

December 15, 2023 khan youtube kal tlangin India ramah Yamaha R3 BS6 tlangzarh a ni tawh a; Mizoramah hauh lawk ve nghal theih niin ni 46 hnuah Aizawlah khuh hawn a ni.

Info Bikes hotupa, Vanlalmuana chuan, “R3 chhuak hmasa kan hre tawh a, engine tha, khalh nuam, petrol heh lo tak a ni a. A hma aiin a that zawk ngei a rinawm a, tlan chak a nuam a, tlan muan pawh a nuam em em,” a ti.

R3 chhuak hmasa kha Rs. nuai 4 tling lo deuhin Mizoramah an hralh a, Thansanga & Sons Auto Division atangin 60 vel a lei chhuak.

R3 chhuak thar hi Indonesia-a an siam sa, a ngai anga India rama lak luh a nih avangin a man a to phah a. A tirah mi 60 velin Mizoram dealer-ah an ngaihven a, a to tak deuh avangin eng emaw zatin an bawhzui rih lo.

Lei ngei tur mi paruk an chahsak a, India hmar chhaka hralh tam ber an nih nghal bakah tlangzarh a nih rualin mi dang pathumin an duh tih an tichiang ve nghal a, chah hun chhung ni 45 vel nghah a ngai thung.

Muantea chuan, “R15 a chhuah tirhin Indonesia atanga lak luh a ni a, tun thlengin R15 Indonesia thatzia kan la sawi reng. Tunah R3 Indonesia kan ti leh dawn a, ram danga mi ang chiah hetah kan khalh ve thei dawn a ni,” a ti.

YAMAHA R3 BS6

A man: Rs 4,97,114 (on-road)

Engine Type: liquid-cooled, 4-stroke, DOHC 2-cylinder, 4-valves

Displacement: 321 cc

Fuel Tank Capacity: 14 Litres

ABS: Anti-lock braking system

Max Torque: 29.5 Nm @ 9000 rpm

Max Power: 42 PS @ 10750 rpm

Ground Clearance: 160 mm

Compression Ratio: 11.2:1

Frame Type: Diamond

Tachometer: Digital