Zirtawpni zan Mizoram Super League, season 7 khelh hmuhnawm takah Champion lai Zarkawt BCA chuan match hmasa zawka an hneh tawh loh Tuikual South chu 93-89 in an hneh. Tlawm zawkah tang mahse Tuikual South hian Play-in an khel phak hram dawn a, BCA pawh hi tling chiang tawh niin hmahruaitu an nih leh nih loh tur erawh nizan Chanmari Vikings leh Khatla TBL te inkhel resultin a hril thung ang. 

Zarkawt BCA tan foreigner Joseph Allen chuanpoint 27 a score bakah rebound 27 zet a nei a, Zonunsanga chuan point 20 thawk chhuak bawkin MVP  Lalrina Renthlei pawhin point 18 a thun bawk. 

Tuikual South tan an foreign player Darrel Bowie chuan point 19, 16 rebound leh assist 10 neiin triple double a nei a, Tuikual South Captain F. Zodinthara’n point 23 leh Lalnunpuia’n point 22 thun bawk ve bawk mahse an chak zo ta chuang lo.

Tuikual South hian match an khelah point 14 neiin table-ah pali na an ni a, Zarkawt BCA lamin match 10-ah point 18 an nei thung. 
Inkhelh hmuhnawm chu

He inkhelhah hian BCA lamin bul tan tha zawkin Tuikual South lam an tawm deuh a, quarter khatnaah hian Zarkawt BCA hi 29-18 in an chungnung zawk. Second quarter-ah Tuikual South lam rawn insiamtha chhovin 25-22 in quarter an la ve thung. Zarkawt BCA chuan turnover neih zauh zauh mahse first quarter an khelh thatin a chhan a, first-half ah point 8 in hma an hruai thei. 

Second-half tan a ni a Tuikual South lamin lehthal tur chuan point tam zawk thun a ngai tih an hai lo. Theih tawp chhuaha an beih ngial pawhin an duh thusam point hlawh chhuak zo lovin point khatin hma an hruai thei hram. Quarter hnuhnung ber theih tawp chhuah leh mahse 21-18 chiah a an chak leh tak vangin BCA lam hi point point 4-in an chak ta zawk a ni. 

He inkhel hi a hmuh nawma inkhelh lai chuan chak zawk tur hriat thiam a har hle a, fans nei tha Tuikual South fans thawm a tha leh pek. Tuikual South fans te hian pawisa thawh khawmin kalna tur lirthei nei lo tan bus an hire thin a, an fakawm hle. 
Play-In chu eng nge?
Play-In hi a sang pali Zarkawt BCA, Khatla TBL, Mission Veng Hotshots leh Tuikual South  ten an khel dawn a, Play-in hi league table-a1, 2, 3 leh 4 atang hian number 1 leh 2 an intum ang a, number 1 hi a chak a nih chuan final a lut thlang nghal thei ang. Number 2 hi an chak chuan game khat dang an khel leh anga a chak zawk zawk in final an lut ang. A awmziah chu final lut turin No. 1 hian vawi khat chak chiah an mamawh a, No. 2 erawh chuan vawi hnih chak a mamawh thung. 

Pathum-na leh pali-na an intum ve leh ang a, Number 3 an chak nghal chuan number 1 leh 2 a chak lo zawk nen an in tum leh phawt ang. Number 4 an  chak zawk erawh chuan number 3 nen game khat dang an khel leh phawt anga,  a chak zawkin number 1 emaw 2 a chaklo zawk an tum ang. A awmzia chu number 1 leh 2 chaklo zawk semi-final a tum turin number 3 hian vawi khat chiah chak a mamawh a, number 4 erawh chuan vawi hnih chak a mamawh thung. 

Result
BCA : 29 - 22 - 24 - 18 = 93
TKS : 18 - 25 - 25 - 21 = 89 

Player stats
Zarkawt BCA
Joseph Allen - 27 pts - 27 rebounds - 3 assists - 2 steals.
Zonunsanga - 20 pts - 4 rebounds - 5 assists - 1 steal.
Lalrina Renthlei - 18 pts - 3 rebounds - 3 assists - 3 steals.
Tuikual South BC
F. Zodinthara - 23 pts - 3 rebounds - 2 assists - 2 steals.
Lalnunpuia - 22 pts - 3 rebounds - 1 block - 1 assists - 2 steals.
Darrell Bowie - 19 pts - 16 rebounds - 2 blocks - 10 assists - 2 steals.