November 22, 2023; Tlawng Fest Organising Committee chuan December 8-9, 2023 chhungin, Kawmzawl Helipad hnuai, Pukpuiah Tlawng Fest hmang turin ruahmanna a siam.

Thuchhuah an siam a an tarlan danin, tuihna leh ramngaw humhalh kawngah te, Mizo nunphung chawisan leh Thalaite hmasawnna ngaihtuahin October 14-15, 2023 khan District Park, Lungleiah Tlawng Fest buatsaih a lo tum tawh a. Inbuatsaihna engemawchen kalpui a nih hnuin rokhawlhna lian tak avangin he Tlawng Fest hi neih a rem ta lo va, chawpchilh taka thulh lailawk a ni.

Tlawng Fest Organising Committee chuan Lunglei lamin kutpui an neih ve tur a zuzi mai phal lovin hun remchang hmasa bera buatsaih leh turin thutlukna a siam a. A hun atan December 8-9, 2023 ruat niin Kawmzawl Helipad hnuai, Pukpuiah he Tlawng Fest hi ropui taka buatsaih nise a ti ta a. Inpuahchahna kalpui tan a ni.

He Tlawng Fest ah hian Beat Contest te, Model Ramp Show te, Carnival te, Cosplay te, Concert te bakah thil dang tam tak buatsaih tum a ni a. Entrepreneurs leh Sorkar Deptt te tan inphochhuahna tur Stalls buatsaih tum niin naupang tan pawh Childrens’ Corner buatsaih tum a ni bawk.

"Lungleiah hian Chapchar Kut bak festival a awm meuh lo va, hei vang hian Lunglei taka festival neih ve hi kan tuihalna a ni a, kumtin he festival hi huaihawt anih theih nan sawrkarah pawh theihtawp chhuah mek a ni a. A hming hi Tlawng Fest tih a ni a, Mizorama lui pawimawh ber Tlawng hnar awmna hmun hi Lunglei anih avangin he hming hi phuah a ni. Tin, he Tlawng Fest hi thalaite hmasawnna atan te, Mizo culture văwn nunna kawngah te, tuihna, ramngaw leh nungcha humhalhna kawngahte zirtirna dawhkan atan hman a ni bawk ang," tiin an thuchhuahah an tarlang.