October 12, 2023; October 13-14, 2023 a buatsaih tum Tlawng fest chu inbuatsaihna thui tak kalpui a nih tawh hnuah thulh lailawk a ni dawn.

Hemi chungchang, Tlawng fest organising committee in thuchhuah siam a an tarlan danin, inbuatsaihna engkim peihfel a nih hnuah, vawiin 12.10.23 khan Divisional Forest Officer, Lunglei District hnen atangin lehkha an hmu a, Tlawng fest buatsaih an tumna hmun chu Riverine Reserved Forest Area a nih avangin a hmun sawn tura ngen an ni.

He lehkha an hmuh hi vawiin tlai khan ngaihtuah nghalin, chawpchilh tak a a hun sawn a ngai chu organising committee in hrehawm a ti tak zet tih an tarlang.

Tlawng fest a tel tur a inbuatsaih zawng zawngte, sum leh pai tha leh zung sengtute, he hun hmang tura Lunglei a lo zin te leh Tlawng fest nghakhlel em em tute chungah thupha an chawi tih tarlangin, hun remchang hmasa berah Tlawng fest hi buatsaih leh ngei tum a ni tih an tarlang bawk.

Chhim lam mipuiten kut ropui tak an buatsaih ve theih nan te, ramngaw humhalh leh tuihna humhalh inzirtirna atan te, thalaite theihna leh thiamna phochhuahna remchang atan Tlawng fest chu buatsaih tum a nih thute an thuchhuah ah chuan an tarlang bawk.