ZALEN May 29, 2024 : Aizawl chawmtu tlawng lui chuan nimin mai khan a nut ber tum leh a len ber tum a tawng a, tui lian hian khawl leh a kaihhnawih te a tihchhiat bakah tunah hian Tlawng lui hi pump tlak a ni lo.

Er. Lalrinzuala Ralte, Superintending Engineer, PHE Aizawl Watsan Circle atanga ZALEN thudawn danin nimina Tlawng lui len lai ber khan a hmaa pump house-a 2017-a an chhinchhiahna chu meter 1.5 zeta sangin a khum a, hei hian pump house-ah harsatna a thlen phah nasa hle tih a sawi.

Tlawng lui hi tun dinhmuna a nu hle a, a hmaa an chhinchhiah-a a nut ber tum chuan, Nephelometric Turbidity unit (NTU)-ah 1080 a ni a, vawiin tlai dar 4-ah khan tui nut zawng hi NTU-ah 1610 a ni a, hei vang hian tunah hian tui hi treatment tur pawhin pump ngam a la ni lo tui nut zawng hi NTU 1000 vel a nih hunah chuan treatment tih theih a ni ang. Nimina tui len lai phei kha chuan hei ai hian NTU hi a la sawng zawk turah an ngai.