Aizawl: Maubawk Branch YMA leh PHE tangkawp chuan nizan hmasa khan Aizawl tui laknaa sangha bomb-tu mi 2 chu manin Police kutah an hlan nghal. Maubawk YMA leh PHED te hian an thudawn bawhzuiin Aizawl khawpui tuilakna Tlawng luia geletine hmanga sangha man tum mi pahnih, Henry Lalherliana s/o MC Lalhmingmawia leh Lalruatzela s/o Lalremmawia Nursery veng ve vete chu manin an kut atang hian Geletine (Neogel) tlawn 15, Electric cape (Detonator) 23 leh Safety fuse feet 3 an man tel a. Bomb hi vawi hnih vel an lo tipuak hman tawh niin an insawi bawk. PHE department-in Aizawl khawpui chawmtu tur tui an lakna a chin chhak lam thui tak thleng hi tui a lo thianghlim zawk nan tiin Maubawk Branch YMA leh Local Council, Ailawng Branch YMA leh Local Council bakah PHE Deptt. chuan an humhalh a, an humhalh chhung hi zahsak turin mipuite an ngen a ni.