Tleirawl pahnih, Rinhlui leh Thartei ten MBA Official Championship-a record thar siam

Chanmari West tleirawl, Chanmari Shuttlers Club (CSC)-a khel, H. Lalrinhlui chu Mizoram Badminton Association Official Championship-a hmeichhe maltana champion thei naupang ber a ni ta.

Inrinnia Ramhlun Indoor Stadium-a khelh zawh tak, NEXA GIG Motors MBA Official Championship 2024 (Junior & Senior)-ah Rinhlui hian Women’s Singles final-ah club khata a khelhpui, Ramhlun South tleirawl, Ramngaihzuali chu deciding game-ah 14-21, 21-12, 21-16-a hnehin a champion.

Rinhlui hi kum 15, thla khat leh ni 12 mi a nihin Mizoram champion a ni thei a, MBA Official Championship-a champion thei naupang ber nihna lo kawl tawhtu, Abigail Lalthazuali’n a chelh lai chu a khum ta ni.

A champion rual hian Rinhlui hian record dang a siam bawk a. Final-a hneh tak, Zualtei’n kum 2022-a kum 15 leh thla ruk mi lek nia MBA tournament-a hmeichhe maltan champion naupang ber a nihna chu a khum thai reh nghal a ni.

Tuna kum 17 mi chauh la ni, Zualtei hi nikum hmasa khan Siaha Ranking Tournament-ah champion-in MBA torunament-a champion thei naupang ber a ni a, kum hnih hnuah Rinhlui a rawn lang ta a ni.

Rinhlui hi tun tum championship-ah hian junior huangah Under 17 Girl’s Singles-ah a lo champion tawh bawk.

Thartei tan pawh record thar

Kum 14 mi chauh, Zoramthari Renthlei pawhin record thar a siam a, senior category hrang hranga MBA Official Championship bakah ranking tournament-a champion thei naupang ber record thar a siam.

CSC player tho, Thartei hi Women’s Doubles-ah Zualtei nen inkawpin Rinhlui leh TC Lalthazuali te tangdun chu 21-14, 21-16-in an hneh a, an champion.

Thartei hi kar hmasaa junior huang intihsiaknaah Under 15 Girl’s Singles-ah a lo champion tawh a. Under 17 Girl’s Singles-ah final a lut bawk.

Record thar siamtu tleirawl pahnih, Rinhlui leh Thartei te hi TATA Trusts (NEIDA) leh MBA thawhhona a Pulella Gopichand Badminton Academy, Hyderabad, Telengana-a training mek an ni nghe nghe.

Record thar dang

Tun tum championship-ah hian record dang pawh siam a ni a. MBA Official Championship khel thei naupang ber record chu kum 12 mi niin K. Lalrempuii leh Lydia Lalnunfeli, Saron BC ten an siam a, Women’s Singles leh Doubles-ah an inlan ve ve a ni.

Upat lamah pawh record siam niin kum 56 mi ni tawh, Dr Malsawmkima (Masky), Mission Veng Badminton Academy chu official championship khel thei upa ber record thar a siam bawk. Men’s Doubles huangah a fapa nen an inlan dun nghe nghe.

A vawi hnih nan Saitluangpuia

Kum 16 leh thla 10 mi lek nia kum 2022-a MBA Official Championship-a mipa lama champion thei naupang ber record lo siam tawhtu, Saitluangpuia Sailo hun a inherchhuak leh ta a, harsatna lian tham tawk loin Men’s Singles champion a ni leh thei.

Nikuma H.Lalthazuala’n champion thei naupang ber record a siam a khum hnuah kuminah Tluangpuia hi amah ngamtu an awm lo hle a, quarter final-ah deciding game a khel tih loh chu straight set vekin final thlengin a chak a. Final-ah pawh Laldintluanga Tlau, Bawngkawn BC nen intumin 21-8, 21-17-in a chak a ni.

Ramhlun Venglai rawlthar, Sihphir Badminton Club tana khel, Tluangpuia hi inelna ngaihhlut hlawh ber leh pawisa fai tamna ber, mipa maltana a vawi hnih nan champion-na a ni.

Ngaihhlut hlawh championship

Chawlhkar hnih awh, MBA Official Championship 2024 hi Mizorama badminton inelna lian ber leh ropui ber a ni a, ngaihhlut a hlawh hle a. Kar hmasa lama khelh, junior category-ah player 215 zet inlan senior-ah 97 zet an inlan a. Inkhel 367 lai a awm a ni.

Badminton Association of India (BAI) calendar-a chuang inelna a nih avangin player-ten an ngai pawimawh a. TATA Trusts (NEIDA) leh MBA thawhhona avanga hmun hrang hrang academy-a awmte pawh inkhel tur hian an haw a ni.

Category 21-ah inelna kalpui niin junior category bikah semi final lut chinte tan lawmman pawisa fai siam a ni a, senior-ah erawh quarter final lut chinte hnenah pawh pawisa hlan an ni.

Result kimchang:

Men’s Singles:

Champion: Saitluangpuia Sailo, SPBC

Runner up: Laldintluanga Tlau, BBC

Women’s Singles:

Champion: H. Lalrinhlui, CSC

Runner up: Ramngaihzuali, CSC

Men’s Doubles:

Champion: Joseph VL Ringngheta, MBC & C. Lalramzauva, BBC

Runner-up: Lalrinawma & Laldintluanga Tlau, BBC

Women’s Doubles:

Champion: Ramngaihzuali & Zoramthari Renthlei, CSC