Aizawl November 22, 2023 : Vawiin khan R. Vanlalena, Judge, Fast Track Court, Kolasib chuan hmeichhe tleirawl kum 14 mi, Bike-a tlanbo pui hnu a, pawngsual zuitu chu thiamloh chan tirin Court thuremna a puang.

Kolasib khaw bul lawk, thingtlang khaw pakhata cheng chuan a fanu kum 14-a upa chu Mangtindama'n a Bike-a a tlanbo pui hnuah a pawngsual zui ni a sawiin, ni 26.11.2020 khan Kolasib Police station-ah FIR a theh lut a. He thil hi a hma ni nga vel liam ta a thil thleng a ni.

Police te chuan thubuai chhui fiahna report kimchang (charge-sheet) chu Kolasib Fast Track Court-ah thehlutin, he thubuai hi Fast Track Court chuan thuhretu hrang hrangte thu sawi a ngaih thlak vek hnuah leh thubuai neitu Ukil thusawi te leh sorkar lam Ukil thusawi te ngun taka a ngaihthlak vek hnuah pawngsualtu a puh Mangtindam s/o Lianthawngthang, Khamrang a cheng thin; Tahan, Myanmar mi chu a thil sual tih-a an puhna finfiahna chu chiang tawkah a ngai a ni.

Court thu tlukna (Judgement) chu vawiin khan R.Vanlalena, Judge, Fast Track Court, Kolasib chuan a tichhuak ta a ni. Mangtindam @ Manga hi tunah District Jail, Kolasib ah tang lai mek a. Ni 23.11.2023 hian Court chuan hearing nei leh in thil sualtitu hrem anih dan tur kim chang an tichiang tawh ang.