Aizawl June 1, 2026 : ZPM chuan vawiin khan an Party Office-ah chhung inkhawm an hmang a, he huna thusawitu Prof. Lalnilawma, Minister of State chuan, “Sawrkarna kan siam tirh atanga vawiin thlenga kan hnathawhte avangin ZPM nih a nuam a, kawng, eng leh tui lamah nasa takin hma kan sawn zel a ni. Tlin politics ni lo, development politics hi keini chu kan thupui a ni,” a ti.

Minister chuan, “Kum thum chhunga nitin thawhpuia han nunpui takah chuan Mizoram Politics hi a hriat theih viau tawh a, ka hmuh chian em em chu Politics-ah hian kalphung nghet a awm theih loh tih hi a ni. A hun leh a hmun a zir zelin a tha kalpui tur a awm a, tun hmaa thil tha ni thin kha tun hunah chuan a tha ber a ni tawh lem lo. Chuvangin kan tun hun ang zel a tha zawnga kal mai hi a pawimawh. 

"Politics-ah hian tlin politics leh development politics a awm a, sawrkar kal tawhte khan tlin politics hi an khel thiam khawp mai a, development an kalpui lo chu kan ti ngam lova, mahse kha chen sawrkarna chang tawh si kha hmasawnna tak tak min thlen lo hi a pawi! Tlin politics ni lo development politics a pawimawh a, hei hi keini chuan kan kalpui mek leh thupui a ni,” a ti. 

Rural Development changtu Minister chuan, “Inthlan hmaa policy bua kan ziahlan thenkhat, tuna hmalak rem chiah lo te pawh a awm. Chutihlaiin kan policy-a awm Village Development Committee din tur kan tih chu hmalak mek a ni a, a Act kan peih a, a Rules kan buaipui mek a, Village Council-te tihchaka hmalak tak tak kan tum a ni. Sawrkar laipui 16th Finance Commission hian Own Source of Revenue (OSR) an ngai pawimawh hle a, hetiang ti thei tur chuan kan V/C te kan tihchak a ngai a ni.

Assam Rifles tui pek leh Laipuitlanga atanga tui pekna tura an hmalakna sawiin Prof. Lalnilawma chuan, "Hei hi kan zawh hunah chuan Aizawl khawpui hian tui kan hnianghnar thei tawh turah kan ngai. Aizawla tui harsat chhan hi Mizoram sawrkar leh Assam Rifles-ten inremna (MoU) an ziakah khan ni khata tui 45,000 lt. pe tura inrem a ni a, hei hi sawrkar chuan phurritah kan ngai lova, kan ti thei ang tiin inremna kan siam a ni. Tuna kan siam mek Laipuitlang atanga pipe chhuak thla hian chhak lamah Durtlang leh Siphir thlengin a tuam ang a, hmar lamah Zemabawkah phei zelin Assam Rifles-te, Territorial Army, Bungbangla a awm thlengin a zawm thla dawn a, kan inchan sem thei vek dawn a ni," a ti.

Heng hnate hi vawi leh khatah zawh nghal vek theih a ni lova, chuvangin tha leh tlo tur ngaihtuah chungin hmalak chho zel a ni a. Politics-ah hian chiang mang lo leh zik tluak mang lova inbeihna hi a awm fova, tlin politics ringawt ni lo, development politics chu an bei tak tak tih a sawi nawn leh bawk.