Aizawl November 12, 2023 : The Leprosy Mission, Mizoram pum huap Inkhawmpui vawi 14-na Baptist Church of Mizoram Biak In, Electric Veng, Hnahthiala Zirtawpni kalta zan atanga neih chu zanin khan a tiak a, he inkhawmpuiah hian TLM Missionary hmasa ber ni turin Ramthianghlimi Sailo d/o Saikunga Sailo, Rawpui tirhchhuah a ni.

Inkhawmpuiah hian Mizoram hmun hrang hrang atangin TLM Mizoram Office Bearers te bakah Chapter hrang hrang leh Unit hrang atangin palai thahnem tak an kal a. Hmun dang atangin The Leprosy Mission Choir, TLM Lunglei Choir, Thingfal Chapter Zaipawl, BCM Leite Pastor Bial Zaipawl te an tel a, Hnahthial khaw chhunga Baptist Kohhran leh Presbyterian Kohhran Zaipawl ten zaia rawngbalwna neiin mimal zaithiam zai ngaihthlak a ni bawk.

Pathianni chawhma inkhawmah The Leprosy Mission, Mizoram Missionary hmasa ber ni turin Ramthianghlimi d/o Saikunga Sailo, Rawpui chu TLM Executive Secretary Rev. Tc. Zodinsanga’n a tirchhuak a, Ramthianghlimi hi Bethani Colony Leprory Association (BCLA), Bapadla, Andhra Pradesh-a pharte enkalwna ah a thawk dawn a ni.

Inrinni khan khawmpui rorel leh hruaitu thar thlan a ni a, thurel langsar zingah TLM Mizoramin Website neih ve ni se tih pawm a ni a, Serkawn Chapter thar hawnna pawm a nih bakah TLM Logo en that rel a ni a, 2024 Budget atan Rs. 41,80,000/- pawm a ni a, hei hi 2023 Budget aiin Rs. 30,000/- (7%) in a tam a. The Leprosy Mission, Mizoram hnuaiah hian Chapter 33 a awm mek a, Kum 2024 Inkhawmpui chu Aizawl-ah neih a ni ang.