Aizawl: Deputy Chief Minister Tawnluia chuan Zirtawpni khan Thakthing veng, Aizawl-ah Government Multi Utility Centre a hawng a, hna thawh chu tlo leh rintlak tur ngaihtuah a tul thu a sawi.

He hawnna puala inkhawm ah Deputy Chief Minister chuan thu sawiin Government Multi Utility Centre chu mipui vantlang tan sawrkar in a siam a, veng chhung mipuite chu a chhawr tangkai ber tur an nih angin a sak hun chhung zawnga vengchhung atanga tawiawmna tha tak an dawng chu lawmawm a tih thu a sawi. 

Deputy Chief Minister chuan, "Mipuite tana hna kan thawh hian a sum senso lam ringawt ngaihtuah lo in hna tha, tlo leh rintlak tur kan ngaihtuah a pawimawh a ni," a ti bawk. Khualzahawm C Lalmuanpuia, MLA pawh in thu sawiin, "UD&PA hi Department pawimawh tak a ni a, Aizawl khawpui leh a chhehvel ah hnuhma tam tak an hnutchiah a ni," a ti.

Government Multi Utility Centre hi a implementing Department chu UD&PA niin nuai 884.73 senga sak a ni a. Ni 12.5.2019 ah sa tan in, ni 30.01.2023 ah zawh fel a ni. He Multi Facility Centre ah hian Parking, Office, weekend market leh Auditorium te awm thei tura buatsaih a ni.