Aizawl April 3, 2023 : Vawiin hian Congress Bhavan, Aizawl-ah Lunglei Municipal Council inthlan result puan tak thlirletna neih a ni a. He huna thusawitu MPCC President Lalsawta chuan, "Kan beidawng dawn lo, kan phur sauh zawk a ni. Vawiinah hian kan tlu a, tlu hlen reng tur kan ni lo, Chak turin kan tho leh ang," a ti.

Lalsawta chuan, "Lunglei Municipal Council inthlannaah Congress Party chuan thei tawp kan chhuah a, kan hah tlang em em bawk a ni. Chutichung chuan kan hlawhtling zo ta lo va, hetah hian tumah dem tûr an awm lo. Pathian duh dan anga Mizorama thil a thlen theihna turin kan thawk zel dawn a, kan beidawng dawn lo, kan phur sauh sauh zawk a ni. Vawiinah hian kan tlu a, tlu hlen reng tur kan ni lo, chak turin kan tho leh ang," a ti.

Congress President chuan ZPM duhsakna hlanin, "Sum chakna hmachhuan loin kan Candidate ten theihtawp an chhuah a, tunah hnehna chang rih lo mah ila mipui rilruah sum leh pai hnawl duhna thuk takin an tuh a ni. Sum hmang tam tam chak tur ni se, State sawrkar fawng vuantu MNF party candidate te eng party mahin kan hneh a rinawm loh a ni. Lunglei Municipal Council (LMC) a hnehna changtu ZPM hi an hlawhtlinnaah Congress party chuan a lawmpui a, LMC Sawrkar tha tak siam tûrin ZPM hi duhsakna ka hlan," a ti bawk.

Congress Party chuan LMC inthlan neih zawh taka Congress Party Candidate-te an chhuang takzet a, sum leh pai hmachhuan hauh lo a an ding ngam chuMizoram a inthlan lo awm zel turah nghawng tha tak a neih an beisei tih an sawi bawk.