ZALEN, September 07, 2025: Season thara Mizorama pro division club-te inelna hmasa ber tur, MSSC Golden Jubilee Celebration MVA Season Opening Tournament chu Thawhtanni atang hian khelh tan a ni dawn a. Mipaah club pasarih awmah Thutak Nunpuitu Team (TNT) Volleyball Club chu an inlan dawn lo va, hmeichhe team li erawh an inlan vek dawn.

Mizoram Volleyball Association (MVA) buatsaih inelna hi Tuikual Indoor Stadium, Tuikual North-ah bul tanin inelna tawp lam inkhel panga chu Electric Veng YMA Hall-ah khelh a ni dawn thung a ni.

TNT hi inlan tura beisei ni mah se September thla hi an kum tin danah an ‘Tawngtai Thla’ a nih avangin an inlan thei dawn lo va, season calendar tlangzarh a nih rualin an tel theih loh tur thu hi MVA-ah an thlen nghal leh a hnuah pawh ziaka an theh luh thu an sawi.

“MVA hruaitute atangin ngenna a nasat em avangin ngaihtuah nawn leh a ni a. Thutak Nunpuitu Team hi volleyball team ni lovin, rawngbawltu team kan nih avangin kan rawngbawlna kan tlanchhiatsan ngam ta lo a ni,” tiin an tel theih loh tur thu hi kar liam ta khan thuchhuah siamin an puang a ni.

Mipa hi Pool A leh B-ah team thum ve ve awmin pool khata awmte an inkhelh kual hnua a hniam ber ve ve an tla ang a, a sang pahnihin semifinal an lut dawn a ni.

Hmeichhia pawh team hnih ve ve awmin Pool A leh B-ah tho thenin pool khata awmte hi vawi khat an inkhel dawn a. Tla awm lovin semifinal-ah Pool A-a chak zawk leh Pool B-a chak lo an intum zui ang a, Pool A-a a hniam zawk leh Pool B-a a sang zawk tum dawn a ni.

Hmeichhe semifinal hmasa zawk hi Tuikual Indoor Stadium-ah Nilainiah khelin a tukah Electric Vengah a hnuhnung zawk khelh a ni ang a. Mipa semifinal pawh Ningani hian Eectric Vengah tho khelh a ni ang.

Final hi Zirtawpni tlai dar 04:00-ah hmeichhiain khel hmasain zan dar 08:00-ah mipa final-in a zui dawn a ni.

MVA SEASON OPENING TOURNAMENT:

Mipa:

Pool A - Tuichangral, Hunthar, Sihphir

Pool B - Khawbel, Chhinga Veng Spikers, Anastasia Electric Veng

Hmeichhia:

Pool A - Chhinga Veng Spikers, ITI Veng GSA

Pool B - Tuichangral, Eric Pautu Academy

September 8, 2025 Fixture @ Tuikual Indoor Stadium

Chhinga Veng Spikers vs ITI Veng GSA (hmeichhia)

Tuichangral vs Hunthar (mipa)

Khawvel vs Chhinga Veng Spikers (mipa)