Mizoram volleyball inelna sang ber, Pro Volleyball League 2023 a zo va, mi mala hming langsar ber chu Kawnpui tlangval, Vanlaltanchhana a ni.

Thutak Nunpuitu Team (TNT) tana khelh sariha point 176 zet beng chhuaktu, Valbuanga hi an team innghahna, an champion chhan, an tanchhan ber tih loh theih loh a ni.

Valbuanga sulhnu a pui
Nikum intihsiaknaah khan Valbuanga hian Mizo Best Player chawimawina a lo dawng tawh a, kuminah a aia thaa inlanin a chawimawina dawn tawh a hum bakah Best Spiker-a thlan a ni.

TNT hi khelh sarihah an chak fai vek a, hengah hian kum 22 mi, Valbuanga hian khelh rukah khel tha ber lawmman, Player of the Match a dawng a. League round tawp bera Hunthar an hneh tum tih lohvah a dawng vek a, hemi tum hian Best Blocker atana thlan ni zui ta, TNT tana thawhhlawk tak bawk, Zosangzuala (Lalmama) hnenah lawmman hi hlan a ve thung.

Khelh sarihah hian Valbuanga hian point 176 zet vaw chhuakin point 53 a hloh thung a, tournament chhung zawngin hniam lai a nei lo tih theih a ni.

Best spiker a lawm
Valbuanga hian mi mal chawimawina ngaihhlut ber a dawng a, a team a champion-pui bawk a, a hming lam rik chuah chuah a nih karah hian heng zawng zawng a thlen theih chhan hi a thiante leh a thawhpuite vang a nih thu a sawi.

“Mi mal theihna a ni lo va, teammate-te tel lo se engmah ka ni lo vang,” a ti a. “Lalmama’n tha tak takin lehlam vuak dang lo se, kan libero Lalramnghakdika leh kan captain (Vanlalchhantluanga Sailo)-ten tha tak takin lehlam atanga ball lo kal (firstball) la lo se, kan setter (Lalliankima)-in vuak tur tha tak min vawrhsak lo se, mi dangin tha tak takin lehlam vuak lo la lo se la engmah kan ni lo vang,” tiin a khelhpuite vang liau liau a nih thu a sawi.

Covid a chhawr
Govt. Hrangbana College-a BA 6th Semester zir mek, Valbuanga hian TNT hi August, 2020 khan a zawm a, a zawm tirh hi khawvel puma Covid-19 a len lai, Mizoramah pawh a intan chhoh lai a ni a. Hripui leng chu a tha zawngin a chhawr thung tih a sawi.

“Covid avang khan engmah a tih theih loh va, zirna a kal thei lo va, pawn lamah engmah a tih theih si lo va, ball kan beng tluk tluk a, chumi rah chu ka chhawr a ni,” tiin a sawi.

TNT hi tun hma atang tawha rawngbawlna nena volleyball kalpuitu niin team tha din tur erawh chuan Mizoram player tha an khawn ve tho va. Tunah chuan Mizorama volleyball hmunpui ber pakhat a ni mek a, Valbuanga pawh hian tun dinhmun a thlen theih chhan hi anmahni vang a nih thu a sawi.

“Ka awm tirh atangin ka mamawh tinreng min pe a, min zirtir a, min hrilh a ni,” a ti a. “Kan coach Hmaa (Lalhmangaihsanga Sailo) hian ka awm tirh atangin min zirtir (train) a, a bul atangin tih dan tur zawng zawng min hrilh a, ka lawm tak zet a ni,” a ti.

“TNT-a ka lut hi a tir atangin ka tan chuan ‘ba hlir’ a ni mai. Pa Puia (Sangthankima) hian fapa ang deuhthawin min en a, min phurpuiin min fuih a. Pa Sawma (TNT general secretary) pawhin fapa angin min en a, thu tha tinreng min hrilhin min fuih bawk a, an lakah hian ba hlir ka nei a ni,” a ti.

Hei bakah hian TNT-a mi dang awm ve leh an office bearer zawng zawngte chungah lawm thu a sawi bawk.

TNT hmangaih vangin India team zawm lo
Japan captain Ishikawa Yuki-a’n jersey No. 14 a hak avanga ha ve, Valbuanga hi nikum khan India Junior team-a tel tura kohna pawh a lo dawng tawh a; mahse, a kal ta lo.

A kal loh chhan hi Pro Volleyball khelh a duh zawk vang a ni pakhat a, an ko tih a hriat hun a tlai vang niin a sawi bawk.

“Kal tura kohna ka dawn kha vawiin hi ni ta se, naktuka chhuah nghal ngai ang a ni a. Pro Volleyball kha tan mai tur a ni bawk a, chuvang chu a ni pakhat,” a ti a. “A chhan lian ber erawh TNT-in ka mamawh zawng zawng min pe a, min mamawh hun lai tak (Pro Volleyball khelh dawn tak)-a kalsan kha ka duh lo a ni,” a ti.

Mizoram huangah pawh, Mizo player tha ber a nih miau avangin sawmtu pawh a nei thuaiin a rinawm a; mahse, chhuah tumna rilru a la put chhin loh thu a sawi.

Hnam dang tel duh zawk
Pro Volleyball-ah hian hnam dang an tel thin a, kuminah pawh mipa team-ah chuan TNT tih lohvin an nei vek a, hmeichhe team-ah pawh an tel.

Social media leh vantlang titia hnam dang tel sawisel lek lekna lam a ri thin a; mahse, Valbuanga chuan Mizo player-ten hma an sawn zel theih nan hnam dang player tha tel zel se a duh tih a sawi.

“Keini aiin an tha a, an level a sang a, kan phak lo. An zuang sang a, an kutthlak a na a, an vuak dan pawh keini theih loh ang a ni thin a, an skill a tha em em a, chungte chu kan tan inzirna a ni,” a ti.

“Hmasawn tur chuan keini aia tha zawk nena inkhelh leh inel a ngai a, chutiang atan chuan hnam dang kan lak lak luh hi a tha ka ti a, duhthusamah phei chuan tun aiin tam hial se ka ti,” tiin a sawi.

Unau nauvin Pro Volleyball-ah
Feet 6 leh inchi 2-a sang, Valbuanga hian kum 2018 atangin ball a beng tan a, tih tak taka a ben erawh kum 2019 a ni a. Tun tumah hian unauvin Mizorama Volleyball inelna sang berah an inlan.

A farnu, amah chhangtu chiah, Lalhriatpui hi tun tumah hian Kanan-ah a khel a, final lutin Luangmual an hneh lo ta thung a. Hriati hian a team tan khelh sarihah point 48 a thawk chhuak a ni.