Russian president Vladimir Putin-a'n Ukraine a run vangin a thian hnai tak Chelsea club neitu, Roman Abramovich pawhin a tawrh phah hle a, UK-a a thil neih zawng zawng hreksak niin chung zingah chuan Premier League club tha Chelsea pawh a tel. Hetia khawh chet theih loh a nih takah chuan zawrh a ni ta a, mi hausa tam takin lei tumin an chhang a, chung zingah chuan LA Dodgers neitupa Todd Boehly chu thlan a ni. 

    Chemical group Ineos-a chan ngah ber British billionaire Sir Jim Ratcliffe chuan pound billion 4.25 zeta a lei ngam thu a sawi hnuhnawh a, tun Zirtawpni khan Chelsea lei tumin bid a thehlut ve chauh a mahse, hun tiam chhung hi March ni 18 thleng chauh khan a ni , hun tiam a pelh tawh vangin Ratcliffe-a bid theh luh hi hnawl sak a ni.

    American sumdawng hausa Boehly hian Chelsea lei nan £ billion 2.5 lai a theh chhuak a, Forbes tarlan danin Boehly-a sum neih zawng zawng hi £ billion 3.6 a ni a, a sum neih zawng zawng chanve aia tamin Chelsea hi lei a tum tihna a nih chu. Mahse, Boehly hi a mal tan bik lova, Swiss billionaire Hansjorg Wyss leh British businessman Jonathan Goldstein bakah British journalist Daniel Finkelstein te nen an tang ho a ni.Todd Boehly hi US baseball team LA Dodgers leh US hmeichhe basketball team Los Angeles Sparks neitu a ni bawk a, NBA team LA Lakers-ah share a nei ve bawk.

 
    Chelsea hi May ni 31 thleng UK sorkar chuan special licence pein club inrelbawl dan pangaia  kalpui remtih sak an ni a, thla khat chhung chauh an neih tawh vang hian tihral vat a ngai a ni. Boehly te hian Chelsea an lei tur hi official taka puan erawh a la awm lo thung.