Inrinni zana Premier League-a Bournemouth an hmachhawn tuma khelmuala a tluk avanga inkhel tihtawp ngaih phah ta, Luton Town captain Tom Lockyer chu ‘a dinhmun a tha’ tih club-in an puang zui ta.

Second half laihawla cardiac arrest vanga a tluk hnuah damdawi thiamten an buaipui nghal thuai a, team pahnihten zawn chhuah a nih laiin an zui bawk.

Kum 29 mi hi hlanga zawn chhuah a nih lai hian nikhua a hre leh hman tawh a, entuten lawm takin an thlah liam a, damdawi in panpui zui a ni.

Luton chuan a hnua thuchhuah an siamah ‘a dinhmun a tha a, endika enkawl zui ngai a la awm’ tih an sawi.

“Kan medical staff-ten Hatters captain (Tom) Lockyer-a hi khelmualah khan cardiac arrest a ni tih an hria a, zawn chhuah a nih lai erawh kha chuan a harh leh tawh a ni,” tiin Luton thuchhuah chuan a tar lang.

“Stadium chhungah khan enkawlna dang pawh pek leh hman a ni a, team pahniha medical staff-te chungah kan lawm thu kan sawi nawn leh e.

“Tom-a hi damdawi inah dah a ni a, min tantute hnenah a dinhmun a tha tih kan sawi duh a, a chhungten an awmpui a, a taksa endik zel a la la ni ang,” an ti.

Inkhel tihtawp lailawk a nih hnuah Luton leh Bournemouth player-te hi khelmualah lut lehin entute hmaah an inlan leh a, Hatters boss Rob Edwards-a pawh a lung a chhia tih hmuh theih a ni.

Lockyer-a hi May thlaa play-off final-a Coventry an hmachhawn tum pawhin khelmualah tluin damdawi in panpui a lo ni tawh.

A lung zai niin June thla khan inkhel turin a fit tawk tih puan a ni.

Premier League pawhin thuchhuah siamin, “AFC Bournemouth leh Luton Town FC inkhel chu player hriselna dinhmun avangin tihtawp a ni,” an ti a. “Tom Lockyer-a leh vawiin inkhela tel player zawng zawngte kan rilruah a awm reng a ni,” an ti.

Luton chuan inkhelh tluan a nih theih loh avanga hriat thiamna dilin, “Player-te tan an khelhpui leh an thian tha dinhmun khatiang a nih lai khan rilru-ah inkhelh a awm thei lo va, staff tan pawh inkhel enkawl a theih bik chuang loh a ni,” an ti.

Bournemouth pawhin Hatters captain dinhmun an hriat veleh, “Tom-a’n nikhua a hria tih hriat chu a hahdamthlak huai mai,” an ti.