Rangkachak bo 39th Battalion Assam Rifles Commandant Col. Jasjit Singh chu May 5, 2016 khan Rs vaibelchhe 14.5 man hu rangkachak phurtute suamna kaihhnawihah man a ni a. April 21, 2016 khan Kulikawn Police Station-ah C. Lalnunfela chuan FIR thehlutin sipai pariat vel bawrin silai kengin Aizawl daia Zampuimanga hmunah an motor an lo tihdin thu leh rangkachak an laksak thu a sawi a. Col. Singh hi a hnuaia sipai te an inhmanhnawih a puh an nih avangin man a ni a. A ni bakah hian sumdawng Bulaki Chand Baid leh zirlai pawl hruaitu hlui Lalmuanawma Mathipi te pawh man an ni. He case hi state sorkar chuan May 30 ah CBI kutah a hlan chhawng leh a. Hetih lai hian Colonel chu bail a chhuah a ni. Lirnghing Mizoram chu 2016 chhung hian lirnghing eng emaw zatin a sawi a, April 13, 2016 khan Richter scale a magnitude 6.9 a sangin lir a nghing a, hei hi a nat ber tum niin mipuite pawh an chiai nasa hle a ni. He lirnghing na tak hi a epicentre chu Myanmar chhunga Mawlaik atanga km 75 anih thu United States Geological Survey chuan a tarlang a ni. 2016 a lirnghing hmasa ber hi January 6 ah a thleng a, magnitude 6.7 vel a ni a, a rawn chhuahna hmun (epicentre) pawh a hnai hle a, Imphal khawthlang lam km 30 vela hlaah a ni. Hei lo pawh hi 2016 chhung hian lirnghing na vak lo a thleng nual bawk a ni. Court Tichhia September 22, 2016 khan mipui pungkhawm te chuan Lungleia court judge te leh Chief Judicial magistrate te awmna chu tualthattua puh pakhat hmel hmuh an tum vangin an tichhia a, mi eng emawzat man an ni. Hemi ni vek hian Gauhati High Court chuan Lunglei-a judicial officer zawng zawngte a la chhuak vek a, Chief Justice Ajit Singh pawhin na takin sorkar venhimna a that tawk loh thu a sawi a ni. Aizawl DC, Kannan Gopinathan chu hemi zirchiang tur hian one-man inquiry commission ah ruat a ni a, October 6, 2016 khan Gauhati High Court chuan judicial officer te lakchhuahna order chu a sut bawk a ni. Bru lak let State thenawm Tripura a relief camp paruka khawsa Bru te lak let lehna hna chu November 2, 2016 khan tan niin lo let thei tur te chhinchhiah an ni a. November 23, 2016 khan a chhinchhiah hna hi zawh niin Bru chhungkaw 5413 atangin mihring 32,857 te chu lo kir turah chhinchhiah an ni a, sorkarin a lo ruahman chhin dan chhungkaw 3445 atang mi 21000 tih chu nasa takin a khum a ni. A taka Bru te'n Mizoram an lo luh tan ni atan hian November 30 chu duan chhin a ni a, a hnuah harsatna hrang hrang avangin thulh a ni a, tun kum tir lama tihah dah a ni ta a ni. Bru te laklet lehna hi Mizoram leh Tripura sorkar te leh Union Home Ministry te thawhhonaa bul tan a ni a, hei hi a hnuhnung ber a nih dawn thu an sawi bawk. Hetih lai hian Bru relief camp a an hruaitu te chuan sorkar hnenah sorkarin anmahni tuamhlawmna tur a ruahman lawk sa bakah Dampa ram chhung a chenna in chhungkaw 750 len theihna tur siam tur leh Bru te tana Autonomous District Council siamsak turin an phut a ni. HPCD NEN INBIA Hmar Peoples' Convention -Democrats (HPCD) leh Mizoram sorkar inremna tura an inbiakna chu tluang taka kalin December 17, 2016 a an inbiak tum pawhin HPCD  te hian silai an rawn hlan kir nghe nghe a. He inbiakna chungchangah hian thutlukna siam fel mumal takin a la awm lo naa HPCD leh Mizoram sorkar te hian Mizoram hmar lama Hmar hnam awm tamnaah mahni inrelbawlna tur self governance structure din theih dan tur awm niin an ngai a. HPCD te hian Hmar hnam te tan constitutional autonomy siam a nih theih nan sorkarah an demand mek bawk a ni.