ZALEN Oct. 13, 2025 : ZPM party chuan MNF-in mipui tana harsatna siam zawnga total bandh huaihawt an rel chu pawi an tih thu leh Dampa bial by-election-ah an thatpui phah a rinawm loh thu thuchhuah an siam.

Thuchhuah an siama an tarlan danin, MNF in Forest Conservation Amendment Act, 2023 adopt duhlohna lantir nan Mizoram pumah Total Bandh huaihawt an rel thlu ta mai chu mak an ti a, ngaihtuah nawn a, sut leh ngei turin an beisei.

"Total bandh hi Dampa bial by election boruak siam tumna mai niin kan hria a, vantlang harsatna thlen zawnga lungawilohna lantir tuma an rorelna sangin thu an vaw thla ta mai hi pawi kan ti a, politics hamṭhaṭna lak tum rana boruak siam tumna a ni tih mipuiin an hriat chian em avangin, mipui zah vang tal pawhin ṭhulh leh turin kan beisei a ni," an ti.

FCAA, 2023 hi, Mizoram Legislative Assembly, MNF MLA-te telna Session-ah lungrual taka adopt a nih angin sawi nawi lova pawm ve mai turin ann beisei tih tarlang bawkin, FCAA, 2023 adopt tura House-a resolution pass a nih dawn khan, MNF MLA tumahin "Remti lo" an ti lo a, lungrual taka pass a ni, an ti a, Hei hi Forest Clearance lak kawnga kan ramin harsatna a tawh thin a lo zangkhai zawk nana Mizoram sawrkar hmalakna a ni tih hi hlau lova pawm ngam turin kan beisei a ni," an ti bawk.