Champions League khel phak tur inchuhna a ngaihnawm chho zel a, he inbeihnaah hian Tottenham chuan red card hmuh vanga player 10 a khel Arsenal si thum faia hnehin beiseina sang tak nen hma lam an thlir mek. Inkhelh pawimawh takah hian Harry Kane chuan Tottenham tan goal 2 khungin, Son Heung-min-a'n goal 1 a khung bawk. 

North London derby-a chaklo zawk Arsenal chuan Champions League khel phak turin beisei an la nei lian zawk a, tunah hian match 36 khelhah point 66 hmuin point khatin Spurs aia sang zawkin a sang pali zingah an tel. Match 36 khelha point 65 neiin Tottenham chu Gunners hnuai chiahah awmin game hnih khelh tur la awmah Arsenal chetsual hlauh nghakin beiseina nung neiin an awm mek. 

Nizan inkhelhah hian Spurs an chungnung zawk a,  minute sawmhnih pakhatnaah Son-a chuan penalty hlawh chhuakin Kane a rawn pen chhuak. Penalty pet goal-in Tottenham goal khatna Kane-a'n a rawn thung. Minute 36 an khelhah Kane-a bawk rawn che chhuakin Spurs goal hnihna a rawn khung, minute 10 hnu lekah an goal thumna Son-a'n a rawn thun ve leh. 

Arsenal hian May ni 17 Thawhlehni zan zanlaiah Newcastle an hmachhawn dawn a, an game hnuhnung berah Everton an mikhual leh bawk dawn a, chak loh theihna chance an nei. Tottenham thung hian May ni 15 tlai lamah Burnley an mikhual dawn a, an game hnuhnung berah Norwich City an tlawh leh dawn bawk a, table mawngpha leh 17-na hmachhawn tur Spurs tan fixture duhawm tak a ni. 

Tottenham khelh hmabak
May 15 - Burnley (h)
May 22 - Norwich (a)

Arsenal khelh hmabak
May 16 - Newcastle (a)
May 22 - Everton (h)

Line-ups

Tottenham XI: Lloris, Son, Kane, Hojbjerg, Ben Davies, Dier, Sanchez, Bentancur, Sessegnon, Kulusevski, Aparecido
Subs: Lucas, Winks, Gollini, Bergwijn, J. Rodon, H. White, Matthew Craig, D. Scarlett, A. Devine

Arsenal XI: Xhaka, Cedric, M.Elneny, Martin Odegaard, Holding, Tomiyasu, Gabriel, Ramsdale, Nketiah, Martinelli, Saka
Subs: Lacazette, Leno, Pepe, B. White, Smith Rowe, A. Lokonga, Nuno Tavares, Z. Swanson, C. Patino