ZALEN October 8, 2025: Ni thum awh tur Mizoram Travel Fest 2025 chu vawiin khan a hawnna inkhawm Mc Cabe Hall, Aijal Club ah Tourism Minister Lalnghinglova Hmar hovin hman a ni a, December-ah Aizawl leh Mizoram mipuite thawng dawt tur buatsaih tum a nih tur thu minister hian a sawi. 

Mizoram Travel Fest 2025 hi tourism in hma a sawn theihna tura inrawnkhawmna, zirhona leh indawrtawnna hun atana Mizoram Tourism Department leh Sawrkar laipuia Ministry of Tourism tangkawp buatsaih a ni a, October ni 8 atanga ni 10 thleng a awh ang.

Tourism Minister chuan tun kum reilote chhunga Mizoramah khualzin zat nasa taka a pun thu sawiin, Sairang thleng rel lu lo lut avangin an pun belh zel pawh a rinawm thu a sawi a. Chumi avang chuan Mizoram chhung ami ten khualzin lo dawnsawn dan kawnga kan inpuahchah that a pawimawh thu a sawi. Tourism Minister chuan Mizoram tlawhtu khualzin zat thang chak hle mahse state dangte nen khaikhin chuan a la tlem thu a sawi a. Khualzin hipna ni pah fawm a kut leh thildang hrang hrang kan buatsaih thin chu kum tina hun nghet nei a, "tourism calendar" siam tha a tih thu a sawi.

Anthurium Festival pawh nakum kum 2026 atang chuan kumtin hun nghet ruat in Reiek ah buatsaih ziah tum a nih thu Lalnghinglova Hmar hian a sawi a. Hetianga tourism calendar siam theih a nih chuan state pawn atanga Mizoram rawn tlawh tum te tan pawh a awlsam phah dawn a ni, a ti. Minister chuan 'tourism' tih hian state pawn khualzin chauh a huamloh thu sawiin, state chhung ami te pawh khaw dang kan tlawh in tourist kan nih vek thu leh, economy than nan local tourism a pawimawh tel thu a sawi bawk.

Mizoram khualzin pung zel tur thlir chungin Tourism Minister chuan inbuatsaihan tha an neih tlan pawimawh a tih thu a sawi a. Khualzinte lo dawnsawn kawngah tour guide-te, hotel, taxi/ can service, dawr leh ei tur zawng zawng bakah mipuite inzirna tur neih a nih a thu sawiin, tourism ah chuan infrastructure, hmasawnna ruhrel din ai mahin mihring hmasawnna ngaipawimawh hmasak a tul a ti. Minister hian tourism hi a tawpah chuan mi tamtak tan eizawnna siamna a nih avangin, tluang takin leh dik taka hma kan sawn theih nan he Travel Fest hi tangkai taka hman a nih a beisei thu a sawi.

Travel Fest hawnna inkhawm neih zawh hian Aijal Club Park ah YWCA nen tangkawpa buatsaih, Mizo Thali Cooking Competition neih chhunzawm a ni. Naktuk hian Chief Minister hovin "Revitalizing Mizoram's Tourism: Sustainable Growth Through Community Partnerships" tih thupui hmangin zirhona neih a ni ang a. Stakeholders discussion leh Tourist Service Provider te tan B2B session buatsaih a ni bawk ang. A ni thum ni chu investor te nen a inkawmna hun atana ruahman a ni.