Aizawl: Comptroller and Auditor General of India tarlan danin Mizoram in ‘State Tourism Policy’ chi hrang hrang a neih loh vangin Tourism lama hmalak na a chak thei lo niin a tarlang a. Mizoram a Tourist Lodge 47 awm zinga 42 te chuan an chawibelh tih a tarlang bawk.

Assembly session, July ni 9, 2015-a pharh taka tarlan danin Mizoramin Tourism Policy, roadmap, tum leh hun bithliah te a neih loh vang-in khualzin hipna kawng-ah harsatna a thlen niin a tarlang a. Kum 2009 atanga 2014 chhung department hnathawh a bihchianna ah CAG chuan Tourist Lodge ten hemi hun chhunga sum an hmuh nuai 841.19 chu sawrkarah an thehlut muang hle niiin a tarlang a. An thehluh muanchhan department lamin an sawi ‘hmun hla taka taka awm an nih vang’ tih chu thla tin hlawh la turin Directorate of Tourism ah an kal thin vangin chhuanlam tlingah pawm theih a ni lo niin a tarlang.

Mizoram a Tourist Lodge 47 awm zingah Champhai, Thenzawl, Mamit, Chaltlang Toursi Lodge leh Tourist Complex, Berawtlang chauhin hlep an nei tih sawiin a dang 42 te chuan an hloh vek tih a sawi a. Kum 2009-2014 chhunga hlep nei Lodge 5 te sum hmuh chu nuai 563.58 niin an inenkawlna senso atan nuai 417.92 hman a ni a ti a. Hetih lai hian hemi hun chhung veka Lodge 42 te sum hmuh chu nuai 266.85 a nih laiin inenkawlna senso atan nuai 734.05 hman a ni tih a tarlang bawk.