Aizawl: Tourism Minister John Rotluangliana chuan Mizoram chhunga Tourism Department enkawl Tourist Lodge reng rengah VIP quota a awm lo tih a sawi. He thu hi Zirtawpnia Serlui ‘B’ Hydel Project Dam bula Tourism Department-in Rs. 3,56,61,000/- senga Tourist Lodge an sak a hawnnaah a sawi a. Minister chuan, “Mizoram chhunga Tourism Department enkawl Lodge reng reng ah VIP quota a awm lo a, mikhual thleng hmasa apiangin room tha chang an chang hmasa ani mai a, room luah hmasa tuten an remtihna a an kian anih loh chuan VIP nih vanga inluahlan ngawt theih a ni lo a ni,” a ti. Tourist Lodge hi ‘Construction of Tourist Resort Phase-II at Serlui ‘B’ under Tourist Destination Project’ Kolasib District hnuaia sak niin kum 2012 April thlaa sak tan kha a ni a, a building sak hna hi kum 2014 February thla khan zawhfel a ni. Hawnna thu a sawiah Tourism Minister John Rotluangliana chuan Tourist Lodge hawn har anih chhan chu a building leh hmunhma te peihfel vek tawh ni mah se tui leh kawlphetha pekna tur duh anga tihfel mai a harsat vang a ni tih a sawi a. India rama a hmasa ber tur ‘skywalk’ chu Sakawr-hmuituai tlangah sa turin chak taka hma lak a nih thu leh Durtlang leh Chaltlang Tourist Lodge inkarah ‘ropeway’ sak hna pawh a bul tan a nih tawh thu a sawi.  bawk. Serlui bialtu MLA K. Lalrinthanga pawhin a bial chhunga Tourist Lodge changtlung leh tha tak mai an neih theih avangin lawmthu a sawi bawk. Serlui ‘B’ Tourist Lodge hi April, 2012-a sak tan niin February, 2014-ah zawhfel a ni a, tui leh electric connection tihfel anih lawk theihloh avangin mikhual thlenna tur a hawn hun erawh a tlai ta deuh a ni. Tourist Lodge building len zawng hi 367.90 sq.m niin a plot area hi 2198.81 sq.m a ni.