Aizawl: Aizawl City Traffic Police te chuan kumin January atanga October thla tawp thleng khan lirthei dan bawhchhia 13996 an man tawh a, dan bawhchhe zinga a tam ber hi two wheeler an ni.   Aizawl City Traffic Police chhinchhiah danin lirthei dan bawhchhia an man zinga 9273 hi two wheeler an ni a, hei hi lirthei dan bawhchhia zawng zawng atanga chhutin 66% a tling a ni. Two wheeler tih lohah chuan LMV ten dan an bawhchhe ngun ber a, lirthei 3128 man a niin taxi chu pathumna an ni a, 1136 man a ni bawk.   Lirthei ten dan an bawhchhiat langsar ber chu signal zawm loh a ni a, hemi hun chhung hian lirthei signal zawm lo tum 5389 man an ni a, a hmun lova lirthei dah (no parking) 4211 man a niin driving licence tel lova lirthei khalh mi 1456 man an awm bawk.   Kumin January atanga October inkar chhung vek hian Traffic Police te chuan dan bawh chhia an man atangin Rs. 4,900,150 an hmu bawk.