Kar kalta Nilaini khan thian pahnih phur chungin zing dar 9 velah Treasury square-ah ka in khalh phei a, kan ti ti pah bawk a. Chutia kan ti ti bawrh bawrh lai chuan Pu Laldenga (L) thlan bula Traffic police duty chuan ding turin min lo signal chu niin. Hmu hek lo i, ka tlan tlang mai a. Whistle a rawn ri tuar a. Ka’n hawi let nak chuan chu Traffic police chuan rum ang reng takin min lo melh a. Dinna kawng kaw tawh hek lo, ka tlan zel a.

Vana Pa hall hnuai atang Temple-a ka’n chhuak thla chiah chu Traffic police-in min lo ti ding chat a. Kan han in side fel a, min man chu a ni ta der mai. Ka driving licence- min chhuh sak hmak a, seizure memo min pe a. “Chawhnu lamah office-ah i rawn ngaih ven dawn nia,” a ti a. Ngaihdam dilin awmzia a awm lo tih ka hria a, ka tum duh ting lo. Thupha erawh ka’n chawi ve luam a.

University lam panin ka tlan thla ta zel a, ka tih tur tul ang angte ka tih zawh hnu chuan chawhnu dar hnih velah khawpui lam panin ka inkhalh chho leh a. Ka fimkhur tawh khawp mai. Kawng sira kamis var haa lo ding, lukhum khum tawh dek chu ka Traffic police hmuh chhoh zut zut tawh mai maw le. Vaivakawn junction-ah Traffic police an lo duty a, min phar nge phar lo tiin ka thlek uluk tawh khawp mai. Chhuk lawk a, “Ka pu, min phar dawn em?” tia va zawh tak kha ka nap tawh mai a ni. Traffic dan bawhchhiat leh kha ka hlau zek zek mai.

Traffic dan bawhchhiat leh ka hlauh em em chhan kha ka fel tak thut vang a ni lo va, hremna hmachhawn leh ka hlauh em vang zawk a ni. Traffic dan kan bawhchhiat ruala hremna kan hmu zui nghal zat ang hian kawng danga dan kan bawhchhiat pawh hian hremna hmachhawn ta zel i la kan ram chu a va nuam dawn em! Corruption-a inhnamhnawihte hian an phu tawk hremna hmu ta zel se, tun aiin nasa takin hma kan sawn ang a, sum kawng bo kan tih fo pawh hi a tlem zawk ngei ang. Eirukna a tlem miau chuan kan kawngpuite pawh a lo tlo deuh tawh ang a, contractor hna thawh pawhin belh chian a dawl tawh ang. Kan lei (bailey bridge) dawhte pawh a chim fo tawh lo bawk ang. Chutih hunah chuan petrol pawlh dal tih te, cooking gas khawih chingpen tih te chu planet dangah kan thawn bo tawh ang.

Ram changkangte changkan chhan hi eng dang a ni lo, dan an pawisa a, an zah a, tumah dan chunga leng an awm lo a, dan bawhchhia chu mi lian mi tê thiar loin an hrem hmak hmak a, hma an lo sawn uak uak mai a ni. Keini pawh hian hma kan sawn dawn tak tak chuan dan kan zawm that a ngai. Tumah hi dan chungah leng lo ila. Sawrkara kan nihna te, kan milenna te hi dan bawhchhiatna remchangah hmang lo ila, dan bawhchhia chu dan ang takin hrem hmak hmak ila, engah nge hma kan sawn loh teh lul ang?!

Chuti ni loa dan chunga leng kan tam a, dan bawhchhe theuh theuh hrem ngam leh hrem ngam loh kan kat nuk chhung chu hma kan sawn tak tak thei lo ang. A ti dik lo zawkin tih dik tumtute kan vau khur khur a, pu chuam te behchhana, “Min han man vaih teh, i châk lo ang. Ka transfer mai tur che a sin,” ti thei apui kan tam viau chuan hmasawn kan la hlat deuh tihna a ni ang.

Hawh u, kan zavai that tlan nan dan hi i pawisa tlang ang u. Traffic rules bawhchhiat kan hlauh tluk zet hian dan dang bawhchhiat pawh i hlau ang u. Thuneitute pawhin kan mi leh sa emaw, kan vua leh vang pawh ni raw sek sek, dan bawhchhe na na na chu hum tum talh lo bawk i la. Tichuan, he kan zotlang ram hian chhawrpial run a la iang ve mahna.