Aizawl: Kolasib damdawi In atanga Surgeon Dr. Zothansanga Zadeng sawnchhuahna order sut leh phuta Joint Action Committee, Kolasib ten ni 6.6.2017 (Thawhlehni) atanga kawngpui NH-54 an dan chu sawrkarin transfer order a sut leh tak avang in Zirtawp zan (9.6.2017) dar 10:24 khan an titawp. Mizoram sawrkar chuan Kolasib District Hospital a thawk mek surgeon doctor Zothansanga Zadeng sawn chhuahna order a lo siam tawh chu sutin a aiah he damdawi In a thawk National Health Mission hnuaia mi Dr. Zochampuia, Surgeon chu Serchhip District Hospital a awm turin Zirtawpni khan order a tichhuak a. He thil hi hriat anih veleh JAC Kolasib te chu thukhawm nghalin Dr. Zothansanga Zadeng transfer order sutna an hmu a nih chuan kawngpui an dan chu an tihtawp theih tur thu an sawi a. Zirtawp zan khan Health & Family Welfare Department chuan Dr. Zothansanga Zadeng transfer sutna leh Dr. Zochampuia Kolasib District Hospital atanga Serchhip a sawnna order chu lehkha pakhatah siamin an thawn a. Kolasib DC Office ten Fax a an lo dawn hnuah zan dar 10:24 khan JAC Kolasib te chuan NH-54 dan pin chu an titawp ta a ni. Kolasib JAC ten NH 54 kawngpui ni 4 lai an dan avang hian Mizoram Fruit & Vegetable Supply Association te chuan phailam atanga an thlai lakluhah nasa takin harsatna an tawk tih an sawi a, kawng danah hian chawhmeh phur lirthei Truck lian 10 chuang an tangkhang a, heng an thlai chawkluh te hi thlai chhe hma thei chi Tomato, Zikhlum, Changkha, Carrot te leh thlai dang te an ni hlawm a, a chhe nasa tawh a an rin thu an sawi a. Heng phai atanga an thlai chawk luh te hi a man an pek lawk vek thin avangin Truck trip khat Rs. nuai 3 atanga nuai 4 man te a ni hlawm a, an thlai NH 54 a tangkhang chu Rs. nuai 60 chuang man niin an sawi a ni.