ZALEN August 5, 2023 : Transport department chuan an hnuaia lirthei chhiah pe tha lo te tan ngaihdamna hun August 3, 2023 atang khan a hawng tan a, tax leh fee hrang hranga late fee an lak thin chu a titawp rih dawn.

Mizoram Motor Vehicles (taxation) Act, 1996 in thuneihna a pek angin Mizoram Governor chuan Mizoram sawrkar, Transport Department hnuaia VAHAN leh SARATHI kaltlanga tax leh fee pek thin, a hun taka pe lo tana late fee pek ngai thin chu ngaihdamna hun a siam a, August 3, 2023 atanga December 31, 2023 thleng he ngaihdamna hun hian a huam ang.

Transport Department atanga ZALEN thudawn danin, Tax hi a pangngai anga khawn tho tur a ni a, rei tak tax leh fees an lo pek loh avanga penalty chawi ngai kha ngaihdam hun December 31, 2023 thleng hi an hawng dawn a ni. Thudawnna chuan "Hei hi tax leh fee hrang hrang  ba motor neituten an pek har avanga penalty an chawi teuh ngai kha a penalty awm tur zawng ngaihdamna hun hawn a ni," a ti.

Navin Kumar Choudhary, Principal Secretary to the Govt. of Mizoram, Transport Department chuan August 3, 2023 khan hemi chungchangah hian thuchhuah hi a siam. He thuchhuah hi Finance Department pawmpuina order,  I.D. No. FIN(EA) : 214/2023-24 dt. 24.07.2023 an lo chhuah tawh behchhana siam a ni.