Aizawl: Transport department chuan Ministry of Road Transport and Highways in thu a pek angin fee hrang hrang a ti sang a, fee thar hi hman \an nghal a ni. Zalen thudawnna in a tarlan danin Ministry of Road Transport & Highways chuan December 29, 2016 khan Central Motor Vehicles (22nd Ammendment) Rules 2016 a chhuah a, hetah hian driving licence form man, a test na tur fee te leh fee dang chi hrang hrang te chu rate hlui aia tihsan a ni a. Mizoram Transport Department hotute chuan Zalen palai zawhna chhangin January 23, 2017 ah he rate thar tur hi bawhzui fel a ni a, a tuk January 24, 2017 ah an hmang \an nghal niin an sawi. Fee zat bithliah tharah hian Learner licence lakchhuah man Rs 50 ni \hin chu Rs 150 ah tihsan a ni a, Driving licence test man Rs 50 lak \hin pawh Rs 300 niin Driving licence-a address thlakna man Rs 20 ni \hin pawh Rs 200 a ni tawh dawn niin Zalen thudawnna chuan a tarlang. Fee dang siam thar hrang hrang te chu- International Driving Permit lakchhuah manah Rs 1,000, Grace period hnua driving licence renew man Rs 300 niin kum khata a tlai apiangin Rs 1000 chawi belh zel a ni ang a, heng bakah hian fee dang hrang hrang chu siam\hat niin Zalen chuan thu a dawng. Zalen thudawn danin Ministry of Road Transport and Highways in thupek a chhuahah hian State sorkarin he dan thar a tih hlawhtlinna kawnga khawl emaw hmanrua a hmang a nih chuan a remchan danin angin State sorkarin an hmanraw hmanna man phuhru turin fee zat hi a tihsan belh thei dawn niin a tarlang bawk.