Aizawl March 17, 2023 : Vawiin khan Govt. T. Romana College-a Women Cell, IQAC leh English Department te chuan an College hmunah hmeichhe chungchang zirhona “National Seminar on Gender Sensitization and Women’s Professionalism : Issues and challenges” an buatsaih a; Prof. Lalbiakdiki Hnamte, Director, College Development Council (CDC), Mizoram University sawi zauna hun a hmang. Hmeichhia chhuanawm te chawimawina an hlan.

Seminar ah hian Govt. T. Romana College hian Mizo hmeichhia zinga chhuanawm thenkhatte chawimawina an hlan a, chungte chu - Vanlalruati Colney (HIV vei te tana thawktu), KC Runremsangi ( Mizo hnam zai chawi lartu leh Padma Shree dawng tura thlan), L. Tochhong IAS (Mizo hmeichhe zinga IAS hmasa ber), B. Lalawmpuii (Mizo hmeichhe zinga AMC Executive Councillor hmasa ber), Lal Riliani (Zuk leh hmuam dona kawnga hmala tu), Er. Lalhmingliani Hmar (Mizo hmeichhe zinga Engineer-in- Chief hmasa ber), Prof. Margaret Ch.Zama (MZU a Mizo hmeichhia Professor hmasa ber), Marli Vankung(Mizo hmeichhe zinga High Court Judge hmasa ber), Teresa Rothangpuii (Social Worker leh Mizo hmeichhe YMA President hmasa ber),  Vanramchhuangi (Social Worker), Nubuangi (Mizo Hmeichhe zinga Two-wheeler taxi khalha eizawng hmasa ber), Neihthangi(Entrepreneur leh Zote Bakery neitu), Prof. RL Hnuni (Mizo zinga Theologian hmasa leh Ordained Minister hmasa ber). Heng hmeichhe chhuanawmte chanchin ziahna “Mizo Nu danglamna thlentute” tih Dr Jenifer Lalbiakdiki, Principal buatsaih chu Prof. Lalbiakdiki Hnamte in a tlangzarh. 

National Seminar bik hi nikhat awh niin ramchhung leh ram pawn atanga mithiam rawn kal te thuziak zirho a ni. March 6 atang khan College chhungah hemi pual hian College level seminar neih chhoh a ni tawh bawk.