Vawi hnih khelhah Manchester City chuan phu takin Bayern Munich an hneh a, treble champion nih tuma an beiseina a la nung zel e.

English champion hian Nilaini zan khan Bundesliga champion chu Uefa Champions League quarterfinals atangin an pet thla a, Allianz Arena-ah 1-1 in inhnehtawk mah se Etihad Stadium-a 3-0 a an lo chak tawhna nen 4-1 in a thiam pali zingah an invawrh kai ta a, semifinal-ah champion lai, Real Madrid an hmachhawn zui ang.

City hian Premier League leh FA Cup nen, English team zinga kum 1999 daih tawha an thenawm, Manchester United hnua a ruala nomawi pathum la leh thei hmasa ber nih tumin an ke an chhep rem mek.

Munich khawpuia inkhelah hian Erling Haaland chuan second half tan deuh chiahah inkhelh hmasaka awlsam taka a lo tlan pelh tawh, Dayot Upamecano-a handball avanga penalty an hmuh chu hlah mah se minute 57-ah tun season-a a goal 48-na a thun ta tho.

Hemi hma second 15 leka Ederson-a'n Kingsley Coman-a pet tha tak a dan kha sawi hmaih chi a ni lo, Brazilian keeper hian dansak lo se thil a danglam dawn chiang.

Bayern hian Joshua Kimmich hmangin minute 83-ah Manuel Akanji-a handball vanga penalty an hlawh chu chhuih lut mah se Etihad-a an lo tlawm tawhna si zawng zawng sutna hun an nei thei ta ngang lo.

City hi February 5-a Tottenham an hneh loh hnuah inkhel vawi 15 an tlawm lo ta a. Tun season-a khelh 13 an la nei a, treble champion ni turin an inchhawp hnai mek zel.

Inrinniah FA Cup semifinal-ah Sheffield United leh Nilainiah Premier League hmahruaitu, Arsenal an hmachhawn zui ang a, he inkhel pahnih hian an hma hun tur a tichiang lehzual ang.

Bayern ve thung hi season liam taa Bundesliga champion-puitu, sawi hlawh taka an bân, Julian Nagelsmann thlaktu, Tomas Tuchel-a'n beisei ang result a la neihpui lo.

Vawi ruk a khelhpui tawhah vawi hnih chakpuiin Champions League leh German Cup atangin an tla tawh a, Bayern boss zinga kum 1991-a Soren Lerby-a hnua bul tan tha lo ber a ni mek.

City laka referee thutlukna a sawisel nasat avanga hnawh chhuah, Tuchel-a hi Bundesliga-ah chauh a insawrbing dawn ta a, a club hlui, Borussia Dortmund lakah inkhel vawi ruk la awmah point hnihin hma an la hruai mek.

Kum 10 liam ta chhunga an champion ziahna league-ah pawh nomawi a la lo lehzel a nih chuan German coach hi Allianz Arena-ah a awm reng kher lo vang.