Aizawl: YHAI, Mizoram State Branch buatsaih, National Trekking & Caving Expedition 2016, 2nd Batch chu nimin zing dar 10 khan Youth Hostel, Luangmual ah Dr. Lalbiakmawia Ngente, State President, YHAI Mizoram State Branch in a vai liam. National Trekking & Caving Expedition hi Mizoramah kum 2006 atang khan buatsaih tan a ni a, he programme-a tel te hi Youth Hostel, Luangmual atanga kal chhuakin Vaipuanpho, Ailawng, Hawlhhah, Nghalchawm leh Sihhmui ah te ke-in an kal a. Sihhmui atang hian Bus in an thlenna, Youth Hostel ah hruai an ni thin. Tunah hian trekking route dang ruahman mek a ni. Ailawng ah hian Khuangchera Puk-ah an lut thin a, hemi hnu hian Reiek tlangah lawnpui thin an ni. Kumin ah hian Batch thum in trekking hi siam a ni a. A hmasa berte hi ni 3.11.2016 khan YHAI State Chairman Pu Zothanmawia’n a vai liam a, hetah hian mi 17 an tel a ni. A hnuhnung ber hi ni 7.11.2016 a chhuak tura ruahman a ni a, mi 30 chuang tel tura beisei an ni. Ni 5.11.2016-a 2nd Batch-ah hian India ram hmun hrang hrang atangin mi 32 an lokal an ni. Tun tuma lokal zingah hian Rajkot, Gujarat atangin Doctor nupa leh an fanu-te pahnih an lo tel a. Anni hian damdawi (medicines) tam tham tak an rawn keng a; Ailawng ah a thlawnin in entirna (Free Medical Clinic) an buatsaih nghal a ni. Hepa hi Dr. J Ganatra a ni a, kum 2009 khan hetiang programme hmang hian a lokal tawh a; nuam a tiin Mizoram a ngaih em avangin tun tumah hian a nupui fanaute nen an lokal leh a ni.