Aizawl October 27, 2023: Khawzawl DC Office-in ruahmanna a siam bawhzuiin Geography Association of Mizoram (GAM) leh Govt. Champhai College, Geography Department te tangkawp chuan vawiin khan Tropic of Cancer-in Khawzawl khaw chhung a tan tlangna hmun an zawng chhuak.

Tropic of Cancer (23 1/2 ° N) in Khawzawl a tan tlangna hi hmun hnihah zawn chhuah identify) a ni a. Heng hmun te hi Khawzawl Hermon Presbyterian Biakin thlang (Bung hnuai) leh Neihdawn kawngin National Highway -06 a pawhna hmar lam te an ni.

Tropic of Cancer in Khawzawl a tan tlangna hmun ah hian chhinchhiahna mawi leh felfai tak siam tum a ni.

He hunah hian Khawzawl Addl. DC Lalfakzuala, DIPRO Lalchhuanawma Ralte; Geography Association of Mizoram atangin Prof. Rualkhuma Colney, Dr. C. Nunsiamliani, Dr. David B. Lalhruaitluanga, Dr. P.C Lalrohlua te bakah Govt Champhai College atangin C. Zirnghakngura, Cicily VL Ruatpuii te hovin zirlai 20 chuang an tel thei a ni.