November 21, 2023; Nizan (20.11.23) dar 8:30 vel khan Saitual chhak Tuivawl leh Saichal inkara buhfai phur truck a chesual a mi pakhat a thi.

Churachanpur a dah tur FCI buhfai phur Ashokleyland Truck MZ 01 G 9317 nizan dar 8:30 vel khan Saitual chhak Tuivawl leh Saichal inkarah a chesual a, kawng thlang metre 20 vel lumin a chhunga chuang awm chhun, driver leh Motor neitu ni bawk S.Lalhmudika (42) Hlimen chu a hmunah a thi.

Chhiat tawh thu hriat a nih veleh Saichal khawtlang atangin mi 100 chuang zet an thawk thla nghal a, an ni bakah Sub.Hqrs YMA Saitual hruaitute leh a hnuaia Disaster Management Committee, Saitual Police, Mizoram Truck Driver Association ten chhiat tawhna hmun hi pan nghalin chhanchhuah hna an thawk a, ruang hi motorin a chilh beh avangin lak chhuah nghal mai theih a ni lo a, Recovery Van pathum hmangin ruang hi nizan dar 12 vel khan lak chhuah theih chauh a ni.

Ruang hi Sub.Hqrs YMA Saitual Office ah lumenpui niin, tukin khan District Hospital Saitualah post mortem a ni a, post mortem zawhah vui turin Hlimenah ruang hi lak a ni.

Lalhmudika hian a nupui leh a fate 4 a kalsan.

Motor in a accident pui buhfai quintal 150 vel hi vawiin vek khan Saichal khawtlangin hnatlangin thiar chhuah hna an thawk nghal a ni.