ZALEN January 21, 2024 : Mizoram hmun hranga a bikin Aizawl leh Silchar kawng siam hna thawh an duhkhawp loh avangin Mizoram Truck Owner Association chuan January 23, 2024 (Ningani) atang tiamchin awm lova an lirtheite tlan tir loh an tum chu an dinna ngaiah an la ding tih an sawi.

Mizoram Truck Owner Association General Secretary Dina Tlau chuan kawng siamthat tura an phut te chu tun thleng hian siamthat mumal a la awm loh avangin an lirthei te an din tir tur chhan a nih thu ZALEN a hrilh a, an lirthei te kawng chhe lutuka tlan tir chu tih chi-ah an ngai tawh lo a ti.

Hetihlai hian Tuialahthei phurtu leh pechhuaktu All Mizoram Petroleum Dealers Association (AMPEDA) President K Lalnghakliana chuan Tuialthei phur te chu an ding ve dawn lo tih ZALEN a hrilh a, mipuite lo chiai lo turin a ngen thu a sawi.

Mizoram sawrkar thuchhuak chuan January 20, 2025 (Monday) atang khan PWD chuan Vairengte leh Sairang inkar kawngpui (NH54) chu war-footing in siam that hna a kalpui a. Hei hian WBM material-a pothole repair leh sidedrain repair te pawh a huam a ni an ti.

He hna thawk tur hian Labour 20 rual chu Mega Food Park-ah riak lutin, labour camp dangte pawh Khamrang - Selesih peng bulah siam zawh tawh a ni. Khamrang thlen hma, Tuitun lei bul leh Rengtekawn area-ah te hna hi thawh tan nghal niin, hna thawh nan hian JCB, vibratory roller leh tipper te chu a hmunah dah tel a ni tiin.

Vairengte to Sairang kawng (NH54) chu MoRTH-chuan NHIDCL enkawl turin gazette-ah chhuah tawh mah se; PWD-in ongoing project pahnih (i) Bilkhawthlir to Kolasib leh (ii) Kawnpui to Khamrang te la changin, a bak chu NHIDCL kutah a hlan tawh a ni an ti bawk.

(Pic - file photo)