Engkima Chawngthu
Vaivakawn

US inthlan chuan Zoram min fan hnen hle mai a. Mizo tam zawk chuan Donald Trump-a kan tan zawk emaw ni tih theih a ni a. Kan tan chhan leh kan hriat dan leh a nihna tak erawh a inpersan viau mai thei a ni.

Eng vanga Donald Trump-a tan nge ka nih ve?: Chhan dang vak a awm lo. US President hi ka lo thlir ve theih chin chu kum 1992 George Bush (Sr) leh Bill Clinton te inbeih atang khan Republican party lam hi ka la tan ve ngar ngar a. Keima mi mal ngaihdanah Republican party lam ngaihdan conservative hi ka awn lam a lo zawk a, vawiin ni thleng hian Republican lam hi ka tan tan ve ngar ngar a. Chumi party candidate Trump hi kum 2016 inthlanah pawh khan ka tan zawk a, kum 2020-ah pawh chuti bawk chu.

Mi mal takin Donald Trump-a hi ka tan em em lem lo. Republican-ho zinga president tura an zawn tumin Trump-a hi a chak ka’n ring lo khawp a, ka tan lem lo bawk. Mahse, mak tak maiin, chelh hlen rual lohvin a rawn duk pur pur ni ber a, US president tur inthlannaah pawh Hillary Clinton khan mipui ngaihdanah chuan hma hruai zawk char char mah se a lehthal a, a chak zawk ta nge nge a nih kha. Tute thuziah vang ni lovin, inthlan a awm chuan ka theih ang angah Republican lam hi ka rilru chuan a awn ve deuh thin avangin Trump-a hi kum li chhung chu tihtak zet chuan ka tan ve ta a. Tun tum inthlanah pawh hian vote an chhiar tawp thleng hian Trump-a hi ka tan a; mahse, ka tan em avang hian ka ngaituahna leh ka rinna erawh a mit tihdel ka phal ve ngai lo.

Trump-a a chak a, a chak leh lo: US inthlan Thawhlehni zan, keini Nilaini zing kan han tho phat kha US inthlan result lamin rilru a luah nghal a. A hma lama atangin mipui ngaihdan leh beiseina atangin Biden hi chak turah ngaih ni mah se vote chhiar zawh hma chu engmah sawi theih ni hek lo le. Beisei tak siin, beisei lo deuh roh chungin kan en ve zel a. Chaw eikham a nih chuan state hrang hrang hlimthla a lang chho tan a. US map chu a sen ta tuar mai a nih kha. Chutah le Mizoram lam pawh kan phur thar leh ta, CNN lam an ngui ruihin a hmuh theih thung a nih kha.

Chutianga US map a sen tuar lai chuan an electoral vote milin chhiarkawp mawlte ka lo chawk a, Trump-a chu chak mai turin kei pawhin ka chhut fel vek hman a ni. A chhan chu India ramah hian vote chhiar hmahruaitu hi 90% vel chu an chak zui miau thin vang a ni. Chutiang karah chuan Biden an thu a rawn sawi a, a chak lo tur thusawi emaw ni tih tur a ni. Trump-a a rawn lang leh a; mahse, beisei angin a rawn confi ta hauh lo va. Court kalte a rawn sawi ta deuh deuh mai. Vote chhiar runpui a reh ta bawk a, an dinna ngaiah an ding ta reng hlawm a. Zawhna leh thu lengvak a tam tan ta khawp mai le. Hun a kal a, TV lam lahin thu thar nei hek suh, phone lak chu kan refresh chhen chung pawhin thu thar awm thei lo. Mizorama Trump-a a chak ngaiha lo ngaiho pawh an nghing leh a, lawmthu sawi tawngtaina hlan tawh hnu pawh tih vak ngaihna a awm ta tlat lo. A rei a, Trump chu a chak zo ta lo nge nge a nih kha.

Dawt nge thu tak tih pawh hriat a har: Dak hmanga vote chhiar tur a tam bawk a, chhiar zawh mai theih ni hek lo le. Mizoramah chuan social media lamah thu lengvak a tam leh ta khawp mai. Trump-a a pawl leh Biden-a pawl pawh ni lo. Trump-a tan uchuak leh Trump-a ngei hrim hrim inkhinna a ni ber e. Trump-a tan lam hian inthlanah dik lo a tamzia leh Biden-a lal chuan khawvelin a chhiatpui tur thu an tlangaupui hmiah hmiah mai bawk si. Lehlam pawh lah hian Trump-a awm dan leh chetvel dan ngei vang hian Biden tan ni chuang lovin, an hnial ve char char bawk nen. Ngaihdan leh thlir dan inang lo karah an inhnial ta chu a ni ber mai a. Khawi zawk nge thu dik chu ni ta ang le?

Zawlnei thupuan thlen dik hlau deuh te, a thleng dik lo ang tih hlauh te, a pui a nawiin fiamthu group atanga kohhran group thlengin Trump-a kan buaipui luih luih ber chu a nih kha maw! Hetiang taka Pathian ringtu inti zinga thu inkawkalh leh inang lo lutuk kan buaipui takte hi ngaihtuah a tithui thin khawp chuan ka hria. Tute emaw hian dawt hi kan thu tak sawi ngei a ngai a. A buaithlak thin khawp mai.

Trump-a a chak loh chhan: Tun tum inthlana Trump-a chak lo chhan ber nia ka hriat chu amah leu luau ber hi a ni. US-in mak tak maiin an ram hruaitu lu-ah an dah a, Kristianna pawha chhan tha viau chuan a hriat a, chutih rual erawh chuan a nun leh chetziaah hian Isua lalna a lang lo ni berin ka hre thin. Pathian thu hlawkna atana hmang siin, Pathian tihna leh zahna tak tak a nei lem lo tih a hriat reng a. Chuvangin, chung lam khian a tawk tawh a ti ni mai hian ka ngai.

A dik tak chuan tun hnaiah phei kha chuan Trump-a hian hna a thawk hman thlawt lo a ni ber a. Eptu lam Democrats leh media ten an chhai buai reng a, chu mi chhang leh insawifiah reng reng chuan a hun a hmang zo va, a tla ta nge nge ni berin ka hria. Trump-a President a nih chiah khan a duh lotuten kawng an zawh a, an buai nuai mai reng a. Mi rothap, mi nasa, huvang na tak nei mi a ni a, Democrats lam lah hian paih thlak dan tur an zawng reng a, an zim buai a, a intal awk ta nge nge a, kumin kum tir lam khan impeachment an ti ta reng a. Media lam pawhin zawhna zawt buaiin an chhaih thinrim reng a, an thangah awkin a tal buai ta nge nge-ah ka ngai.

A mizia renga ti pung pung chi, tawngkam sum kar lem lo, ri pawp pawp chi a ni a. A dik tak chuan Republican ngaihdan chu a keng kawh viau a, thil tam tak chu a ti ve bawk e. Hnathawh turte a siam hnem a, thil tangkai tam tak a thawk nachung hian a mizia hian a zir hlawl lo va, term hnih a hmang ve dawn ta lo ni awm tak a ni. Kumin chhoa an campaign lai tak takte kha chuan a mizia hi thup deuhin tlemin insum thiam ve deuh se la chu heti hi chu a nih ka ring lo.

A tawp bera Trump-a chak loh chhan hi Biden pawl lam chak em em vang ai mah hian Trump-a a duh lo, ning leh nikhualo ti hi an tam em a. Anni hian Biden hi an duh viau vang ai mahin, Trump-a duh lohna avang hrim hrim zawkin Biden hi an thlang ni berin a lang. Biden-a vote-tu 30% vel hi chu Trump-a duh loh vanga Biden vote zawk an nih a rinawm.

Sakawlh kha a lo kawlh leh lo: Khawvel hi a mak khawp a, kum 2008 kum khan Barack Obama hi inthlanah a chak tum khan khawvela sakawlh lo kal ang deuh khan kan lo beisei a, kum li a lal a, sakawlh a lo ni lo va, kum li dang a lal leh a, kum riat chhung khan sakawlhah a chang hman lo emaw ni teh reng ni. Tunah pawh hian Democrats lam hian a thiangzau zawkte chu an ni tehmeuh a. An vai hian an thiangzau vek lo va, an vai hian mawngkawhur leh tuai, patil an tan lo ang. Zu tamna veng nia kan hriatah hian zu an zuar vek lo va, Aizawl veng changkang bera insawi laiah pawh hian a chenbeh veng hi chu an awm ve bawk a nia.

Trump-a-a tantuten a tan ve lo an tih dan en hian Trump-a-a zia dik tak an kai ve ni hian a hriat a. Mi dang zahpahna nei lo, tawngkam chhe ber thlenga hman duhna hi Kristian zia a ni mawlh lo. Mizorama Biden-a hawtu, Kristianna tan intite hi piangtharna pawh nei lem lo, Isua nuna seng lut duh chuang lo, a hminga Kristian ve maite kan tam hmel ve tho ka ti. Kan chet dan leh kan sawi duh zawng, kan buaipui atang pawh hian kawng tam takah kan inen let fo chu a tul vein ka hre thin