Territorial Salvation Army Youth (TSAY) buatsaih short film insiam siak chu Zirtawpni zan khan result puan a ni a, Bethlehem Corps SAY te an thiam ber. Pahnihna hi Khatla Corps SAY te an ni a, Zemabawk Corps SAY te chu pathumna an ni. 

TSAY Short Film Competition 2022 thupui atan hian 'Chakna atangin chak leh zualnaah an kal thin' tih chu hman a ni a, he thupui hmang hian short film hi an insiam siak a ni. Endik hna thawk tur hian Mizo film industry lama tawn hriat nei tha tak tak  - Aldrin Zosangliana, Dawrpui Vengthar Corps, B. Lalbiakvela, Lunglei BCM, Malsawmtluanga, Khatla Presbyterian te ruat an ni a, Bethlehem Corps SAY te kutchhuak hian endiktute lung a dum ta ber a ni. 

Pakhatna hian lawmman pawisa fai Rs. 50,000 leh trophy an dawng a, pahnihna leh pathumna ten Rs. 30,000 + trophy leh Rs. 20,000 + trophy te an dawng bawk a ni. A tel zawng zawng hnenah hian participation prize pek vek an ni bawk.  

Mimal lawmman 
Mimal lawmman hrang hrang siam a ni a, Bethlehem Corps SAY te an langsar hle. A pumpuia titha ber Corps hian mimal lawmman pathum an la a, Khatla Corps ten pahnih laiin Ramthar Corps ten pakhat an la ve bawk. 

Best Actor atan Lalmalsawma, Khatla Corps thlan a ni a, Ruthi Lalnunfeli, Ramthar Corps chu Best Actress a ni. Best Director lawmman latu chu F. Vanlalhlimpuia, Bethlehem Corps a ni a, Best Editor leh Best Videography pawh C. Lalliansiama leh Osiama Picture te hmangin Bethlehem Corps ten an la a ni. 

TSAY Short Film Competition 2022 result puanna hi Ramhlun Corps SAY nula Angelina V.L Hriatpuii chuan a host a, Mizo Idol Grace Lalchhanhimi (Kolasib Venglai Corps) leh Youth Icon Zothanpui (Chanmari West Corps) bakah Ronnie Lalrinmawia (Chanmari Corps) ten zaiin mipui an awi a ni.   

TSAY Short Film Competition 2022 Result
1st - Bethlehem Corps - Rs. 50,000
2nd - Khatla Corps - Rs. 30,000
3rd - Zemabawk Corps - Rs. 20,000

Mimal Lawmman 
Best Script Writer - Lalbiakzuala, Khatla Corps
Best Actor - Lalmalsawma, Khatla Corps
Best Actress - Ruthi Lalnunfeli, Ramthar Corps
Best Director - F. Vanlalhlimpuia, Bethlehem Corps
Best Editor - C. Lalliansiama, Bethlehem Corps
Best Videography - Osiama Picture, Bethlehem Corps