National Bank hrang hrangte chuan tunlaiin an kalphung an her rem a, State Bank of India pawhin service charge chu April 1, 2017 atanga hman tan turin ruahmanna a siam a, bank zinga lian ber  a ni bawk a sawisel a hlawh hle mai. Bank account a pawisa dah zat awm tur thlengin  bithliah fel a ni tawh a ni. Hei hi social media ah a darh nual tawh a, mipui thinrim chuan bank te chu tun thla tawp lamah hian inthuruala dawr lo turin ngenna te an theh darh hial a ni. Mizoram chhungah chuan Rural Bank leh Mizoram Cooperative Apex Bank Ltd. chuan an customer te hnen atanga charge hi lak an tum ve lo tih an sawi tawh bawk. Hetianga National Bank te’n hma an la ta mai hi ‘layman’ tan chuan hriatthiam a har ang reng a, bank lam hian an kalphung an her danglam a nih chuan a hrilhfiahna pawh mipuiah an tidarh tur a ni a. Mi thiam thenkhat chuan Central sawrkarin cashless sawrkar kalpui a tumna nghawng niin an ngai a, ‘pawisa’  (cash) virvel chu a ip tlat avangin pawisa tualleng vak tihtam tumnaah an ngai bawk a ni. Bank te hi Corporate an ni emaw Co-operative an ni emaw sumdawng an ni a, sumdawng chuan hlep a nei tur a ni a, hlep awm tur pawhin thil a kalpui tur a ni,  chutih rualin a dawrtute tan samkhai thei ang berin awm a tum tur a ni ve bawk. Tuna hmalak an tum danah hi chuan mi rethei leh hnuaihnung zawkte’n an tuar dawn a, thla tin sawrkar atanga hlawh tlem zawk la te, sumdawng tenau leh thla khat khawsak cheng sang bi tlem te khawl harsa ti chin zawng zawng chu a nghawng dawnin a lang. Kan ram angah chuan hetiang hi mi tam zawk kan nih a rinawm hle bawk a ni. Mizoram chhungah National bank an awm nual tawh a, mipui hnena loan pechhuak a inti pung zel tur an nih laiin mipui sum lakah an chak hle a, loan an pekchhuah tur (CD Ratio) ah erawh an chhe hle thung a. An awm chhan hi an hai chiang tih a lang a, a tam zawk hi chu an awm tulna a awm em ni? tiin zawhna a awm rum rum thei awm e. CD Ratio chhiat chungchang hi chu Central YMA pawhin ngai mawhin bank thenkhatte pawh a lo ko tawh a nih kha. Heng bakah hian khawtlang tana Bank te’n an pek let tur Corporate Social Responsibility (CSR) pawh Bank te atang hian a khawrh a khawh chhuak sak ngaih chang a awm fo bawk. Mizoram Sawrkar chuan Apex Bank tia hriatlar a nei a; SBI peng pakhat Mizorama branch ngah ber Mizoram Rural Bank a awm leh bawk a. Heng bank 2-te hian National bank an phut thar tur ang chu an lak ve loh tur thu an sawi tawh bawk a ni. Apex leh MRB te hi kan ram chhunga bank inbun zingah CD Ratio leh CSR hmang tha pawl an la ni lehzel bawk a ni. Mizoram Sawrkar pawhin sawrkar Bank hi dawr turin Department te hnenah thuchhuah a lo siam tawh bawk a ni. Pawn lama sum luangchhuak tur vengin kan ram chhunga pawisa vir tirah mipui te hian mawh kan nei a, bank kan dawr tur te pawh kan thlan fimkhur a pawimawh tawh hle niin a lang a, ramin a hlawkpui ber kan dah hmasak thiam a tul viau e.