Aizawl; February 15, 2023, Nilaini zan dar 6:45 vela a nupui hlui, Lalropari (46), Champhai Kanan rawng taka ulhbun silaia kap hluma tlan bo zui ta, Lalropianga (43) chu chin hriat lohin a la bibo a, Tahan a thleng tawh ni a hriat a ni.

ZALEN thudawn danin Lalropianga hi Champhai leh ramri depa awm police-te chuan a theih ang angin a chin an ngaihven reng a, Myanmar ram chhung Zohnahthlak te pawhin an ngaihven ve reng bawk a, tun dinhmunah chuan tualthattu hian Tahan a thleng tawh nia hriat a ni.

Media hrang hranga tar lan a nih tawh angin, Lalropianga hian a nupui hlui, Lalropari chu Champhai Kanan-a an chenna inah luhchilhin rawng takin a kap hlum a, pawi a khawih zawh hnuah tlan bo zui nghal a ni.

Mi lirthei a ruk chhuah hmangin Zokhawthar lam a pan a, chuta tan chuan Myanmar a lut ni a ngaih niin,.Zokhawthar bulah a lirthei hi hmuh ni mah se, he thu ziah lai thleng hian chin hriat lohin a awm zui a ni.

Rawng taka a pasal hluiin a kah hlum, Lalropari hi Champhai Kananah C. Kapzara in luaha khawsa niin, a nu, kum 90 mi vel leh a fapa naupang ber nena khawsa an ni a, sumdawnna leh a rem rem thawka inhlawhfa thin a ni.